PBS
![](https://www.urupang.com/wp-content/uploads/2020/04/DSC00680-8.jpg)
[ba bteng]“Kata pat ka long kat kum ka por phi mei ieid” pynshai ka para marjan.
“Hooid nga sngewthuh tangba kat katta ka pisa ha ngi hi mynta nga sngew ka la pynjot lypa ia ki” kren khia ka Mei ieid.
“Ah! ba ngan im palat spah snem tip sa kaei ngan iohi” ong ka mei ieid.
“Ngam lah mutdur shuh phi” ong ka para marjan.
“Phi tharai phi dang lah ban iakynduh sa katto katne phew snem hynrei ma nga la sa tang khyndiat snem eh” ong ka Meiieid ia ka para marjan.
“Shu long tang ka jingiathuhkhana tang ban myllen hynrei kiei kiei baroh ki la kylla lut ym dei ba kylla ka pyrthei hynrei kylla ka jingim jinglong jong ki briew” ong ka para marjan bad ka pyndung kwai biang ia ka Meiieid.
“Ki shait ong kylla ka pyrthei, hynrei kan kylla leh aiu ka pyrthei, u briew kein bad ka jinglong jong u kaba pynkylla lut ia ka pyrthei. Yn niew tang kaei la jan baroh ki liang khamtam mynta ba la ia stad ia nang lut ki jingkylla ki stet bha” ong ka para marjan bad ka ai ia u waidung ha ka Meiieid.
“Ka dei kein ka jingong jong phi. Nga kynmaw mynba dang khynnah ma nga 70 snem tam mynshuwa ki briew kim da ialap eh ia ki skul hynrei bunsien ki kren ia ka rep. Mynta pat da khongpong, ki kham iakren ia ka skul ban ia ka rep. Haba kumta kam iapher re ka por?” ong ka Meiieid bad ka syllud ia la ka khohsiew kum kaba la thait.
“Shano shuh kito ki por pahuh shriew, phandieng, jingbam khlaw mynta haba la iabeh lut ka jingshong skul sha sor ne khapsor ne wat shabar jylla. Shano kin phohsniew shuh ia ka kam rep?” ong ka para marjan.
“ Sngewtynnad ban kynmaw ia ka mynnor hynrei kumno pat ia ka lanor?” ong ka Meiieid.
LYNNONG – 6
Ka sngi leit u Kynsai ka sah sa tang 3 sngi. Ka kmie, u Kpa, ka hynmen jong u ki la sngew kynjah. Ki tip ba um slem shuh ban pyndep ia la ka jingpule hynrei ka jingieid shi iing kam duh hi. U Rangsan te um da i patiaw than ia la u hynmen, ka paw pynban ba u Kynsai un dei ka por leit noh sha jingpule.
“Shi sngi shuwa ba u khun un leit biang shathie ka biang ba ngin shet ja shi iing bad ngin thied da u syiar Khasi ban bam doh. Ka mat ia rem kam lei lei” ong u Kpa.
“Ka biang ka biang Pa” mynjur ka Banrilang.
“Katba sngewbit ma phi kpa, nga lei nga biang beit” ong ka kmie bad ka dang ot ia u soh water-melon ban ia bam hadien shi kynta ba ki bamja.
“Mano pat ban leit thied uta u syiar?” kylli ka kmie.
“Ong ia i Hep kein (Rangsan)” tyrwa ka Banri.
“Tang ia nga beit, ong ia u ban leit noh la shi sngi kein” ong u Rangsan da kaba khapbrip khmat shiliang kum ban kdew ia u Kynsai.
“To ieh ngan leit ma nga ruh biang ngan ioh iaid bam lyer pyngngad toi” ong u Kynsai.
“Te, ka don ka jingmyntoi em ba phin ioh lyer pyngngad” ong u Rangsan bad u wiat samrkhie. [yn dang bteng]
Phi don ban ong eiei?