Nongpoh, 10 Jylliew:
Shi bynta ban teh lakam ia ka jingtuid bad ka jingwan kamai spah jubor jong ki bar jylla ha kane ka Ri Lum Khasi, da kaba shim kabu lyngba ka jingtrei ha ki Kompany bapher bapher, mynha ka 8 tarik mynta u bnai ki nongshimwai ia ki Toll Plaza hapoh ka jylla, ki la lah ban seng ia kawei na ki seng ia kaba la tip kum ka All Meghalaya Toll Plaza Contractor Association (AMTPCA).
Ha ka sngi ka AMPTCA ka la ioh ruh ban jied ia ki nongkitkam ba pura jong ka seng, ba kynthup naduh ka Kong S. Shylla kum ka President, General Secretary M. Dkhar, Treasurer B. Nongmalieh bad arngut ki Adviser ba kynthup ia u Ma Thomas Nongtdu bad T. Lapasam.
Haba iakren bad ki nongthoh khubor, na ka liang jong u Bah B. Nongmalieh, Treasurer ka AMTPCA, u la ong ba ka nongrim ba ki seng ia katei ka AMTPCA ka long ban iada ia ka jingtuid jong ki bar jylla sha kane ka jylla, kiba la kjit lut ia baroh ka spah kaba don ha kane ka jylla bad ha kajuh ka por ban plie lad plie lynti ia ki khun samla ka jylla.
Ka AMTPCA ka don ruh ia ka jingthmu ban pynrung kam tang ia ki samla khasi ha ki jingtrei bapher bapher hapoh jong ki Toll Plaza kiba don hapoh ka Jylla, namar kumba ka long baroh shi katta, ia ki kam hapoh jong ki Toll Plaza la trei tang da ki bar jylla suda, kumta hadien ba ngi la iohi ia kane ka jingeh bad kaba pynduhnong ruh ia ki khun samla ba khlem kam khlem jam, ka pynlong syndon ia ngi kum ki Contractor ba ngi seng ia katei ka AMTPCA, ong u Bah B. Nongmalieh.
Kumba ka long mynta ka AMTPCA, ka la lah ban ai kam haduh 50 ngut ki khun samla ha ki Toll Plaza bad nangne shakhmat ka don ruh ia ka jingthmu ban nangthep kam tang ia ki samla khasi ban trei ha ki Toll Plaza, u la bynrap.
Phi don ban ong eiei?