Jowai: Ka Jaintia Hills Autonomous District Council (JHADC), myn hynnin ka sngi, ha ka sngi shnong dorbar Lyiur ba khadduh jong ka, ka la mynjur ia ka Bill lane ki kyndon ain ba la thaw kyrpang na ka bynta ki Dolloi bad ka Election jong ki.
Ia katei ka bill la tip kum ka the Jaintia Hills Autonomous District (Election to the Office of Dollois) Rules 2019 bad kaba dei ruh ka jingpynkylla ia ki katto katne ki bynta jong ka ain (Act) jong ka the Jaintia Hills Autonomous District (Establishment of Elaka and Village and Election, Appointment, Powers, Functions and Jurisdiction of Dolloi/Sirdar and Waheh Shnong) Act, 2015.
Ka JHADC ka la hap ban pynkylla ia katei ka Act (Ain) ka long hadien ba la mih ka hukum na ka iing Bishar Meghalaya High Court ba dei ban pynkylla ia ka form thep kyrteng ki Dolloi (Nomination Forms) ha ka por ba ki thep kyrteng ban iakhun ia ka kam Dolloi kaba dei ban kynthup ruh ia ki kam runar jong ki (lada don) katkum ka jingbishar ne rai da kano kano ka iing bishar.
Ka Dorbar Lyiur ka JHADC ka la sdang naduh ka 25 tarik u bnai ba la dep bad la dei ban pynkut ia ka ha ka sngi Ba-ar, hynrei dei na ka daw ka jingkhlad kyndit u Lamphang ka Iing Dorbar, la pynsangeh ia ka Dorbar ba la hap ban pynkut noh ia ka mynhynne ka sngi ha kaba ka iing dorbar ka la mynjur ban pdiang ia katei ka Bill kaba la wanrah hapoh ka iing Dorbar da u ma Fineliwell Bareh uba dei u Executive Member badei khmih ia ka Political Department jong ka Council.
Phi don ban ong eiei?