Mynsaw u nongniah thuk thuk ba syllad ka trok ha Erpakon

Nongpoh: Uwei u samla na ka shnong Pahamsyiem, u la mynsaw jur hadien ba ka Scooty kaba u niah, ka la shah syllad ha kawei ka trok bad kaba don ia u number AS-01-PC-3750, ka trok kaba thmu ban hiar sha Guwahati.

Katei ka jingjia aksiden ka la jia hynnin ka sngi, ka la jia ha ki bynta ba NHAI ka pyniaid ia ki kali tang ha kawei ka liang jong ka surokbah NH-6, namar kawei ka liang jong ka surok ka dang don hapdeng ka jingmaramot, ha kaba la ong ba ka daw ka jingshah syllad ia utei u samla ka dei namar ka jingpynher sted palat jong katei ka trok bad kaba la wanrah ia katei ka jingmynsaw jong utei uba niah Scooty.

Ia utei u samla uba la mynsaw jur la pynkit noh sha Civil Hospital Nongpoh bad namar ka jingshitom kaba la kham jur la pynkit noh ia u sha Shillong ban ioh ka jingsumar ba kham bha.
Haba la jia katei ka jingjia aksiden, u nongniah jong kateu ka trok, u la phet bak na katei ka jingjia bad iehnoh ia ka kali ha ryngkat bad u shabi, kumta halor katei ka jingjia, na ka liang ka bor shnong jong ka ne ka shnong Erpakon, ki la pyntip noh mar mar sha ki bor pulit bad na ka liang ki pulit ka Nongpoh Police Station ki la wan shimti noh ia katei ka kali.