Shillong, 12 Jylliew:
Ka Hynniewtrep National Liberation Council (HNLC) lyngba u Bah Sainkupar Nongtraw, Publicity Secretary jong ka lynba ka kyrwoh ba la phah sha ki lad pathai khubor mynta ka sngi la ong ba ka seng HNLC ka long kaba la kloi ban ia kren ia suk lada ka sorkar pdeng ka khot.
Ha ka kyrwoh la ong ba ka ki la seng ia kane ka seng 29 snem mynshuwa halor ka nongrim bad dei halor ka nongrim ba ki sa ieng ban ialeh, u sainkupar u la ong ba kiwei ki seng lehnoh ki la mih khlem kano kano ka nongrim bad kane kala pynlong ia ki ba kin suk ban pyndem wait.
Ka HNLC halor ka jingkynthoh u Myntri Rangbah, ka la ong ba kane ka jingkren ka dei ka kam kren khyllung khynnah suda tang namar ba ym kwah ban poi sha ka jingiakren ia suk bad u kwah ban shu pyni ba u dei u khliehduh jong ka sorkar MUA II.Ka seng HNLC ka ong ba ka pynpaw ia ka jingsngewnguh ia u nongialam ka HNYF u Bah Sadon Blah, KHNAM youth wing President Bah Thomas passah, KSU bad u MLA ka UDP na Mawlai u bah Embhah Syiemlieh ba kila pynpaw ia ka jingsngew ka jong ki ia ka jingleh bym suid niew jong u Dr Mukul ia ka jingkwah ia kren ia suk jong ka seng HNLC, ha ka juh ka por ka buh ka jingkylli ba lei ki MLA na Khasi-Jaintia ki sngap jar jar.
“Ka jingpdiang burom ia ki seng lehnoh ANVC, ANVC(B) bad UALA ka long ban pyni ba dei tang ki seng lehnoh na Garo Hills kiba lah ban ia soi ia ka sorkarkular ia suk bad u Myntri Rangbah,” la ong ka kyrwoh bad ha ka juh ka por ka HNLC ka pynkynmaw ia kaei kaba u PA Sangma (bam kwai ha dwar u blei) u la ong ba u Mukul u dei u Chairman jong baroh ki Seng lehnoh ha ri Lum Garo . Ka long kaei kaei kaba sngewlyngoh ban iohi ba u Myntri Rangbah u ong ba ki HNLC ki dei ki seng lehnoh bad ha ka juh ka por u kyntait ban ia kren ia suk.
Ka seng HNLC ka pynkynmaw ba dei halor ka jingkular jong u Myntri Rangbah bad ka Myntri Kam Poh Iing kiba la kular ban thung ksiang hynrei kumba ka paw mynta kila shah pynbiej ha ki bad kane kala wanrah ia ka jingbita bad lada ka long kumne kumno ka jingsuk kan wan ha ba ki nongialam ki long kiba thok ba jler, la kynnoh ka seng HNLC. Ka HNLC ka don jingkyrmen mynta ha u myntri Rangbah Duh jong ka Ri bad ha u Myntri Khynnah ka sorkar pdeng u Kiran rijiju ba kin pynbeit ia kane ka jingeh bad dei halor kane ba ki khlem khot pakhang shnong ha ka Independence Day ban pyni ba ki kwah ban ia kren ia suk wat la u Myntri Rangbah ka jylla u kren kumno kumno ruh.
U Bah Sainkupar u la ong ba ka seng ka ieng skhem ha ka nongrim kaba ki don, kin nym pyndem wait wat la ka long ha kano kano ka dur ruh. Lada ka sorkar pdeng ka long kaba la kloi ban ia kren ia suk na ka liang jong ka seng HNLC ruh kalong kaba la kloi ban ia kren ia suk, la pynkut ka kyrwoh na u Bah Sainkupar Nongtraw.
Phi don ban ong eiei?