Shillong, 09 Nailur: U Lamphang ka iing dorbar u AT Mondal u la ong ba ka jingwanrah ia ka ka liangpyrshah ia ka jing bym shaniah shuh ia u, kum u lamphang dorbar, kam dei satia kumba ki la kynnoh ba ka sorkar ka la phiel lane ka la jop.
“Haba nga trei ia ka kam ngam tip kumno nga trei, lehse halor ki katto katne ki bynta ki don. Ngin ia peit lada ngan dang neh”, la ong u Mondal haba kren hadien ba la wai ka dorbar mynta ka sngi.
Kane ka dei ka sien kaba ar ba ka liangpyrshah ka la rah da ka mat ban weng noh ia u Mondal na ka shuki Lamphang ka iing dorbar, hynrei mynshwa ki la shah rem noh bad ha kane ka kynti, ym tip kumno kan long.
U Mondal u la kyntait ban ong eiei haba twad jingmut la ka don ei ei ka jingthmu ba sha lyndet halor ka jingwanrah ia ka NC pyrshah ia u ha ka sien kaba ar.
“Ka NC ban weng ia u Lamphang kam don eiei ban pyniadei hapdeng ka jingjop bad ka jingrem ka sorkar”, la ong u Mondal.
Hynrei na ka liang u James K Sangma u MLA ka NPP bad u dkhot ka liangpyrshah, u la ong ba ka daw ka jingwanrah ia ka NC pyrshah ia u Lamphang ka dei namar ka jingbym ailad ban pynlong dorbar bun sngi. U la ong ba u Lamphang ka iing dorbar u la pynlong dorbar tang khyndiat sngi bad bun ki mat ba iadei bad ka jylla ym ioh lad satia ban rah ha ka dorbar.
“Da kaba pynlong dorbar khyndiat sngi, u Lamphang u la khang lad ia ka hok bad jinglait luid jong ki MLA. Um ailad ban treikam bha ka iing dorbar thawain, kaba ngi sngew ba ka la dei ka por ban ai da ka jingsneng kaba tyngeh da kaba wanrah da ka NC ban weng noh ia u”, la ong u James K Sangma.
Hynrei ha kawei ka liang, la sngewthuh ba ka jingwanrah ka liangpyrshah da ka NC ia u Lamphang ka thew indairek ban weng wat ia ka shuki u Myntri Rangbah ka jylla. Lada jia ba u Lamphang un khyllem, u Myntri Rangbah ruh u lah ban don ha ka jingma namar ba kumba ka long mynta, bun ki MLA ka Congress ki bym sngew tynnad ia u Dr Mukul Sangma.
Tangba ka jingjop ne ka jingshah rem jong u Lamphang, kan shong ha ka buit ki ia pyndonkam ha katei ka sngi iatynjuh kaban long ha ka 16 tarik.
Phi don ban ong eiei?