Babu Kular Khongjirem.
Hadien ka thma ktien hapdeng ka District council, ka state govt bad u governor,mynta pat sa ka thma ktien hapdeng ki NGOs, ka sorkar MDA bad u Governor jong ka Meghalaya.Ka jingpyn slem u governor ban mynjur ne kyntait ia ka ordinance halor ka Meghalaya Resident Safety Amendment bill ka la pynshaiong ngain ia ka sorkar MDA ba la lamkhmat da ka NPP bad kano kano ka ordinance kan treikam tang hapoh 6 bnai bad lada kam pass ka Assembly hapoh 6 bnai,ka ordinance kan iap noh.
Mynta lah jan dap 2 bnai ei ei ba katei ka ordinance ka la shu sahkut ha office u Lat bad sa tang khyndiat bnai lah ban pynlong noh da ka session ka Assembly khlem pat sign u Lat ia ka ordinance.Don sa ki NGO kiba leit pah bad leit tynruh sha u Lat ba un mynjur kham kloi ia katei ka ordinance hynrei u Lat u sngap mam man halor kane,Ka jylwit jylwat ha District council bad ka jingkyrshan u Lat ia ka CAB bad ka jingdawa ki NGOs ba une u Lat um don hok shuh ban long kum u Governor ka Meghalaya kan nang jngai nang jngai shuh shuh ia ki kam hapdeng u Lat bad ka state jongngi.
U Lat u lah ban dang kuman shuh shuh sa katto katne por halor ki kam kyrkieh (immediate issues)ki nong Meghalaya namar wat u Secretary jongu ruh u la shah weng noh bun tylli ki kam ba u bat lait noh sa tang ka kam Raj Bhavan jong u Lat.
Sa kawei pat ka mat ba ka Sorkar MDA ka la ia kynduh jingeh mynta kalong halor ka burning issue CAB.U chief minister ka Meghalaya u la ioh nam kum u Hero napdeng ki chief minister ka North East ba ula long u nongialam uba nud bad shlur ban pyrshah CAB hakhmat ka Delhi. Phese,ha Lok Sabha pat ka party jongu kam nud pyrshah ne kam nud pynkut noh ia ka jingiadei jongka bad ka sorkar NDA u Modi.Ka MP ba marwei ka NPP na Tura kaba dei ruh ka para trai u Chief minister ka ai ka jingkyrshan ba pura ia ka CAB bad ai ka vote ban kyrshan ia ka CAB.Kane ka la pynlyngoh hi ngain ia ki nongialam ka NPP khamtam ki NGOs jong ka state jongngi kiba kim shym poi pyrkhat satia ia katei ka MP na Tura ba kan leh kumta.Imat ka NPP ka khlem issue satia ia ka whip ba kan vote pyrshah ia ka CAB.Hangne, ngi iohi biang sa kawei ka jingleh arsap hapdeng ka sorkar MDA,ka MP lem bad ki NGOs kiba dang rhem bha ka jingmut jingpyrkhat jongki ban pynlong jingiakhih pyrshah ia ka CAB.Mynta ki NGOs lem bad ki paidbah ka Meghalaya kim lah shaniah shuh ia kane ka sorkar MDA bad u Governor jong ka state namar ka ktien bad ki kam jongki,ki iaid la ka jong ka jong.
Ki party ba ia treilang bad kane ka sorkar MDA (lait noh ka Bjp)ki dei ban pynshai sha u paidbah ia ka nongrim ba ki ieng halor ka CAB lym kumta ki paidbah kin kynnoh lang ia ki ruh ba ki dei ki agent party jong ka sorkar NDA.
Lada ka Rayja Sabha ka lah shisha ban pass ia kane ka CAB,ka jingiakhih ki NGOs kan nang jur shuh shuh nange shakhmat bad lada bakla tiak hangne,kane ka sorkar MDA ba la ialam da ka NPP ha Meghalaya ka lah ban jot ban pra noh pynban bad ki sngi jong ka jingkhyllem jongka, ki la nang jan wat la ki partner(parties ba ia trei lang)jongka ki la ia rai kut ban pynneh beit ia ka triang haduh ba kut jong kane ka term jongka.
Phi don ban ong eiei?