Nongpoh: Ki nongialam HYC, Nongpoh Circle, hynnin ka sngi ki la leit ban buh jingthoh sha u Range Officer ka tnad Forest (T), Nongpoh, kata na ka bynta ban kyntu ia u ba u dei ban phah pom noh ia ki Diengbah, kiba don ha shnong Quinine ka shnong kaba don harud ka surokbah NH-6 ha Ri Bhoi, namar ki la don shibun ki Diengbah hapoh katei ka shnong, kiba la la buh jingma ia ki paidbah ha katei ka shnong.
U Samla Tony Shylla, General Secreatry Nongpoh Circle, u la ong ba kham mynshwa ki dkhot ka seng na katei ka shnong, ki la dep ban ai jingthoh sha ka tnat Forest, hynrei na ka liang ki briew ka tnat Forest kim shym la shimkhia ban leit pynkhyllem noh ia kitei ki Diengbah.
Kumta ka seng, haba ka la iohi ia ka jingma kaba ap ia ki paidbah na ka jingdon kitei ki Diengbah, kam banse ban phah jingthoh noh sha u Range Officer ka tnad Forest (T), Nongpoh, khnang ba un shimkhia halor katei ka phang bad ban lait na kino kino ki jingjia ba sngewsih hadien habud.
Namarkata, ka seng ka kyntu ia u Range Officer ka tnad Forest (T) Nongpoh, ba un dei ban shimkhia noh mardor, namar katei ka jaka kaba don bun ki Diengbah, ka dei ka jaka kaba bun ki nongiaid nongieng bad kaba ruh ka jaka kaba shait ialum paidbah.
Phi don ban ong eiei?