Nongstoin, 17 Iaiong:
Hynnin ka sngi u wei u ehrang jong ka kynhun kaikhlaw ka GNLA u la wan ban pyndem noh ia lade ha khmat jong ki pulit ka Shallang Police Station. U tei u eh rang ka GNLA, uba la wan ban pyndem wait noh la tip kyrteng kum u Joshua N Marak bad ia kaba la ju khot ruh kum u Jikal, u ba dei ruh na ka shnong Rongkhugre.
Katkum ka khubor na u heh pulit jong ka District la ong ba u tei u ehrang ka GNLA u dei u ba don lang ha ka kynhun jong u Jimmy, Kongsil bad u Megam, bad katei ka kynhun ka ju leh ia ki kam pyntriem ha ki thain Goreng, Wahthre, Riangdim, Ryndi, Khalu bad ha ki thain Nengchigen kaba hap hapoh ka West Khasi Hills District.
Shuh shuh u tei u heh pulit ka District u la iathuh ruh ba u tei u snar ka GNLA u bala wan pyndem noh ia lade u la leit ban pyniasoh ia lade bad ka GNLA ha u snem 2014, bad naduh ba u la leit pyniasoh bad katei ka kynhun kaikhlaw na Ri lum Garo u la trei shitrhem na ka bynta ka jong ka.
U SP ka WKHD, u bah S. Nongtnger u la iathuh ruh ba ka daw kaba la pynlong ia u tei u snar ban wan pyndem noh ha khmat ka ain ka long halor ka jingsngew thait bad sngewdom ka jong u ia ki nongialam kiba kham heh jong ka GNLA, ha kaba ki dkhot kiba rit ki shu ia trei shitom tang na ka bynta ka jingmyntoi shimet jong ki heh ki hain katei ka kynhun kaikhlaw.
Ha kawei pat ka khubor u wei u dkhot barim jong ka ANVC (B) u ba la tip kyrteng kum u Foirmen G Marak 36 snem ka arta u ba na ka shnong Rongkhugre kaba hap hapoh ka Shallang PS u la wan pyndem noh ha katei ka juh ka sngi ha Shallang PS.
Ka khubor na ki pulit ka iathuh ruh ba utei u snar u la leit pyniasoh bad ka ANVC ha u snem1997, bad u ba dei ruh u nonglum pisa jong ka GNLA na baroh ki mahari, na ki khyrdop khrong khajna.
La iathuh ruh ba u tei ruh u la pynpaw ba u la sngew ngiah ban dang don ha katei ka kynhun bad ha kitei ki kam namar ba um shymla ioh jingmyntoi ei ei ruh em ia lade hynrei tang ban pynmyntoi ia kitei ki ar tylli ki kynhun kai khlaw bad kumjuh na ka jingshah khynra ha ki pulit na kapor sha kapor.
Kitei batoh ar ngut ki ehhrang, ki la wan ban pyndem tang da ka met suda khlem kano kano ka tiar ialeh.
Phi don ban ong eiei?