Nongpoh, 13 Iaiong: Kum ka jingshim khia halor ka jingsahteng, ym tang halor ka kam pyn itynnad ia ka Sor Nongpoh, hynrei ia kiwei kiwei ruh ki kam sahteng jong ka surok 4-lane, mynta ka sngi ki nong ialam ba ha khmat jong ka Nongpoh Town Committee (NTC) ki la pynher da ka dorkhas sha ka Dr.Pooja Pandey, Deputy Commissioner ka Ri-Bhoi District, ban dawa ia ka ba kan shim khia na ka bynta ban pynsted ia baroh ki kam sahteng jong ka surok 4-lane, khamtam ha ki bynta jong ka sor Nongpoh.
Lyngba katei ka Dorkhas ba la pynsngew sha ka DC Ri-Bhoi, ka NTC ka la kdew bad ujor ruh ia kiwei kiwei ki jingduna ban kyrpad ia ka DC ban shim khia halor katei ka kam, ba kynthup ia ka jingslem ban trei noh ia ka kam ban pynbha briew ia ka sor Nongpoh, ka jingtrei torti ia ki Nala um, ka jingbymtreikam ki Street Light, ka jingbym shna ia ki surok iaid paidbah (Approach road), ka jingker (divider) da ki nar kiba ym skhem bad kumjuh ka jingslem ban tei noh ia ka jingkieng iaid kjat jong ki paidbah.
Khnang ban kham pynsted ia baroh ki kam sahteng bad khamtam ka jingsahteng jong ka kam ha kaba pynbha briew ia ka sor Nongpoh, ka NTC lyngba ka Dorkhas ba la phah sha ka Deputy Commissioner, ka la kyrpad ia ka DC ban shim khia ia kane ka kam bad khamtam ban pynlong ia ka jingleit jurip lang ia ki kam ba sahteng ha ryngkat naduh ka bor District, NHAI, NTC, ka Kompani bad kumjuh ruh ki Contractor, khnang ba kane ka kam ban pynbha briew ia ka sor Nongpoh bad kiwei ruh ki kam ba sahteng jong ka surok 4-lane ha ki thain Nongpoh kan long kaba iaid beit iaid ryntih.
Phi don ban ong eiei?