Shillong:Ka Khasi Students’ Union South Central East Circle (KSU SCEC), Pynursla ha ka 6 tarik u Risaw, ka la leit ban khynra ia ki kot ki sla jong ki nongtrei bar jylla sha ki jaka ba pyntrei ia ka surok 2 Lane NH 40 Shillong Dawki da ka Company ARSS bad ka SS Infrazone.
Ia kane ka jingleit khynra kot khynra sla ha kane ka sngi, la lamkhmat da U Samla Ennocent Khongstia, uba long u President ka Circle lem bad kiwei kiwei pat ki nongialam ka ka Seng.
Ha kane ka sngi ka Seng ka la lap ba ki don ki nongtrei bar jylla ki bym don ia kino kino ki kot ki sla kiba biang ban pynshisha ialade bad ki bym don ruh wat ia ka labour registration katkum ba la buh ha ki kyndon ka aiñ Meghalaya Identification, Registration (Safety& Security) Of Migrant Workers Act, 2020 bad ki don ruh ki nongtrei ba kine ki company ki dang shu wanrah shen kiba la shu rung bad pynrung be-aiñ sha ka jylla, namar ba kim don wat ka ka rusit ban pynshisha ialade ba ki rung na Entry point kaba don ha Umling. Shuh shuh ka Seng ka la lap ba kine ki artylli ki company ba pyntrei ia kane ka surok kim don ruh wat ia ka Work Permit na ka bynta ban pyntrei ia kane ka kam.
Ka Seng ha kane hi ka sngi ka la hukum ia kine ki nongtrei bar jylla bym don ia ki kot ki sla kiba biang ba kin mih noh shisyndon na kane ka jaka ba hap hapoh ka jingkhmih ka Circle, kumjuh ruh ka la maham tyngeh ia kine ki company ba kim dei ban wanrah nongtrei barjylla khlem da pynbiang shwa ia ki kot ki sla.
Ka seng ka pynrem jur ruh halor ka jingkheiñ sting bad jingleh bym suitñiew ka tnat ba dei khmih ia ka Labour ban pynthikna ba ki nongtrei barjylla, ba la wanrah da kine ki Company kin biang ia ki kot ki sla, haba ki wan trei sha kane ka thaiñ. Kum ban pynkynmaw ruh, ba na ka por sha ka por ka seng ka la buh ia ki jingujor (Complaints) sha ki Ophisar jong ka tnat labour ba kin leit jurip bad pynthikna ba ki nongtrei bylla bar jylla kin biang ia ki kot ki sla ba donkam, hynrei ngi sakhi ba kane kam ju poi shano shano bad ka shu kut tang ha ki miej bad ki file jong kine ki Ophis.
Kumta ka Seng lyngba kane ka kyrwoh ka maham tyngeh ia kino kino ki company, ki malik, ki contractor ne ki riew shimet, ba kim dei ban wanrah nongtrei bar jylla hapoh ka thaiñ khlem da pynbiang shwa ia ki kot ki sla ba donkam, shuwa ban pyntrei ia kino kino ki jingtrei bad nangne shakhmat kito ki bar jylla bad ki nongwanrah nongtrei bar jylla khlem da pynbiang ia ki kot ki sla kin shim hi ia ka jingbah khlieh lada jia eiei ia kito ki nongtrei bar jylla ki bym don ia ki kot ki sla ba donkam. Kyntang iawai ka seng ka kyntu jur ia baroh ki Rangbah shnong bad kiwei kiwei pat ki khlieh nongsynshar ba kin long kiba peit ngor bad husiar ia ka jingwan poi ki dkhar khlem kot khlem sla sha ki shnong, ki raid bad sha baroh ki jaka ba hap ha ka jingkhmih jong ki bad lada ki lap ia kiba kum kita, ki dei ban pyntip mardor sha ka seng ba kan leh ia kaba donkam. Ka seng nangne shakhmat kan nangpynjur shuh shuh ia ka jingkhynra ia ki kot ki sla kum ka Work permit, Labour registration bad ki rusit na ki entry point ia baroh ki barjylla lyngba ki shnat treikam ka seng kiba don ha ki jaka bapher bapher bad kiba hap hapoh ka circle, ong ka kyrwoh ba la phah da u Samla Ksanborlang Thabah General Secretary ka KSU South Central East Circle.
Phi don ban ong eiei?