Shillong, 15 Jymmang:
Ka North East Indeginous Peoples Federation, kaba don ka ophis heh duh jongka ha Guwahati, ka la phah ia ka dorkhas sha U Chief Secretery ka Meghalaya, U KS Kropha, ha kaba ka la dawa ba ka sorkar Jylla, kan pynphai noh ia ka khajna, kaba ka sorkar, ka la lum na u dewiong, na u mawshun bad kiwei de ki mar poh khyndew, ba ka la shim na ki trai jaka bad ka daw, ka long namar ba ka sorkar Jylla, kam lah satia ban pynbeit ia ka jingkhang dewiong, kaba la pyn treikam da ka National Green Tribunal (NGT).
Katei ka seng, lyngba U bah Erwin Syiem Sutnga, uba dei u nongai jingmut jong katei ka seng, halor ki kam ain lem bad U Bah Marshall Biam, uba dei u lamphang jong katei ka seng, ki dawa, ba ka sorkar Jylla, kan pynphai noh ia ka khajna, kaba ka sorkar, ka la lum naduh u snem 1972 bad ka daw, ka long namar ba ka sorkar Jylla, kam shym la kit khia satia ban pynbeit ia ka jingkhang dewiong jong ka NGT, kaba naduh u snem 2014.
La ong shuh shuh, da katei ka dorkhas, ba ka Meghalaya, ka don mynta ha ka jinghiar ka ioh ka kot kaba khraw shibun eh bad ba la hukum ruh, ba ia baroh ka thup dewiong, kaba dang sah sha ki par, dei ban shimti noh, da ka sorkar Jylla.
Ha ka rai jong ka Supreme Court, ha ka mukotduma jong ka Threesiamma Jacob pyrshah ia ka Geologist Deptt, kaba 864 2013, katei ka kashari, ka kren shai, ba ka sorkar, kam don ia kano kano ka mar poh khyndew bad kumta, ka dei tang ia u trai jaka, ba un lum khajna bad kumta, ka jingleh jong ka sorkar Meghalaya, ka dei kaba beain shibun eh bad la ong ruh ba ka Para 9 jong ka Sixth Schedule, ka ong ba ka sorkar Jylla, ka lah ban lum khajna, tang na ki par dewiong, kiba ka ai wai ma ka.
Ka seng, ka kynnoh, ba ka sorkar Meghalaya, kam shym la leh eiei ruh em, na ka bynta ban iarap ia ki riew shem lanot, kiba la duh ia ka kamai kajih bad ba kim lah shuh ruh ban trei, da kiwei pat ki kam, na ka jingkhang dewiong bad kumta la dawa, ba ka sorkar Jylla, ka dei ban pynphai noh ia ka khajna kaba la ioh lum sha ki trai jaka, ba kin wad da kiwei pat ki lad jongki, ha ka ioh kam ioh jam.
Phi don ban ong eiei?