Shillong, 12 Jylliew:
Ki dkhot ka liangpyr shah ki la dawa ba ka sorkar ka ei ban shim ia ki lad ki lynti ban pynthikna ba ka ktien Khasi bad ka ktien Garo dei ban ioh rung ha ka 8th Scheduled ka riti synshar ka ri.
Na ka liang u Myntri Rangbah u Dr Mukul Sangma u la kular ba ka sorkar kan buddien ia kane ka kam bad ka sorkar pdeng ban pynthikna ba kine ki ar tylli ki ktien ba kongsan ha ka jylla kin ioh rung ha ka thup jong ka sorkar India.
U Myntri Rangbah u la pynthikna ia kane halor ka Resolution ba la wan rah da u MLA ka Sohra u Bah Titosstarwell Chyne. Haba wanrah ia kane ka Resolution, u MLA ka Sohra u la ong ba kine ki ar tylli ki ktien jong ka jylla ki dei kiba kongsan bad ka la dei ka por ba ka sorkar kan shim khia ba kin ioh rung noh ha ka 8th Schedule ka riti synshar ka ri.
U Bah Chyne u la ong ba ka ktien Bodo kaba kham duna ki paid nongshong shnong ban ia ki Khasi ka la ioh rung ha ka 8th Schdeulde ka riti synshar ka ri.
U la ong ruh ba lada ka ktien Khasi bad Garo kin ioh rung ha ka thup ka riti synshar ka ri, kan plie lad ia ki samla ban ioh jam ioh jam bad ruh kan pynsuk ba kin ialeh ia ki eksamin bapher bapher ha ktien lajong.
U Bah Chyne u la ong ba ia ka ktien Khasi la ithuh da ka Calcutta University naduh u snem 1900 bad wat ka Gauhati University ha u snem 1948.
U MLA ka NPP u James K Sangma ha kawei ka liang u la kdew ba ka dei ka jingbym ler ka sorkar ban shim khia ba kine ki ktien kim ioh rung ha ka riti synshar ka ri.
U la ong ba la don 22 tylli ki jait ktien ba la rung ha ka 8th Schedule, u Sangma u la ong ba na kane ka thain North East, ki don tang lai tylli kynthup ka ktien Bodo, Assamese bad Manipuri.
U nongialam liangpyrshah u la kdew ia ka jingong jong u myntri kam pohiing ka ri India ha Parliament ha u Lber 2012, haba u la ong ba la don 32 tylli ki jait ktien kynthup ka ktien Khasi ba la dawa ban pynrung ha ka 8th Scheduled bad ki don 8 tylli kiba la phah da ka sorkar hynrei ka ktien Khasi kam shym la don ka jingphah na ka sorkar.
“Namar bym don ki kyndon ban pynrung ia ka ktien ha ka 8th Schdeuld, kan bha ia ka sorkar ba kan shim khia ban buddien bad ka sorkar pdeng ban pynrulong ia kane”, la ong u Dr Roy.
Phi don ban ong eiei?