Shillong, 16 Nailur:
Ka myntri ba peit ia ki kolej bad skulbah, ka Kong Roshan Warjri ka la ong ba ka jingpynmih hukum ka sorkar jylla ban khang noh ia ka CMJ University, la shah pynsangeh ha ka High Court Meghalaya.
Haba jubab ia ka jingkylli ba la wanrah da u MLA ka Sohra u Bah Titossterwell Chyne mynta ka sngi hapoh ka iing dorbar, ka Kong Roshan ka la ong ba ka sorkar ka la dep pynmih ia ka hukum ban khang noh ia ka CMJ University hadien ba la lap ia ki kam bymman jongka hynrei ka High Court ka la pynsangeh ia kane ka hukum ka sorkar bad kane ka kam ka dang sah ha ka jingbishar.
Shwa ia kane, haba jubab ia ka jingkylli jong u MLA Mawlai u Bah Embhahlang Syiemlieh, ka Kong Roshan ka la ong ba ki don 8 tylli ki skulbah kiba la dep jingbit ka sorkar bad kita ki long ka William Carey ha u snem 2005, ka Martin Luther Christian University 2005, ka Institute of Chartered Financial Analyst of India ha 2005, ka Techno Global University ha u 2008, ka University of Science and Technology ha 2008, ka CMJ University ha u snem 2009, ka Mahatma Gandhi University ha u snem 2011, bad ka University ofTechnology Management ha u snem 2011.
Hynrei napdeng kine, dei tang ka Techno Global University kaba ka ai jingbit ha u snem 2008 kaba khlem pat treikam satia haduh kine ki sngi.
Ka la ong ruh ba ka North East Adventist University ka dang sahteng ha ka jingbishar bniah ka ophis jong u Lat ka jylla haduh kine ki sngi.
Phi don ban ong eiei?