Shillong, 17 Nailar:
Ki samla pule ka ka NEHU hapoh ka lama ka North Eastern Hill University Students Union (NEHUSU) mynta ka sngi ki la rah lama hakhmat ka ophis u vice chancellor ban dawa pynduh noh ia ka rukom pyniaid khamtam ha kaba iadei bad ka rukom ai bhah ia ki samla ha ka hostel.
Kine ki samla ki la kynnoh ba ka bor pyniaid ka NEHU ki la pynmih ia ka rukom pyniaid kaba thymmai ha kaba ki la ailad ia kito kiba dang wan pule thymmai ban ioh jaka sah ha hostel bad kane ka la long pyrshah ia ka jingsngew jong ki samla pule.
Ki la ong ba katkum ka 96th Academic Council kaba ha u Jylliew mynta u snem, ka la pdiang ia ka jingtyrwa ka Dean Student’s Welfare (DSW) ba khlieh da u H Kayang kaba long pyrshah ia ka jingpyniaid.
Ki la dawa ba dei ban pynhiar shuki noh ia u DSW lada ka bor pyniaid NEHU kam shah skhor ia ka jingeh jongki hapoh ar taiew.
“Ngi dawa ba ka bor pyniaid ka NEHU ka dei ban pyndam noh ia ka jingtyrwa ka DSW namar ba kam iahap bad ka long pyrshah ia ki samla pule bad bym shongnia satia”, la ong u nongialam ka NEHUSU u Bah Brandon Lyttan.
U la ong ba ki samla pule ki pyrshah jur ia ka jingtyrwa ka DSW ban ai jaka sah shwa ia ki samla ba dang wan pule thymmai.
U la ong ba kumba 80 percent na ki jaka sah hostel la ai sha ki samla ba dang wan pule thymmai bad kaba sah la sam sha ki samla pule ba kham rim bad kane ka la ktah jur ia ki samla pule khamtam kito kiba wan pule na jngai. “Ki don kumba 445 ngut ki samla pule ba dang buh ha ka thup ban ap” u la ong.
U la ong ba ia ki jaka sah ha hostel dei ban ai sha ki samla pule 3rd Semester katba ia kiba dang pdiang thymmai dei ban ailad ban sah kum kiba dang wan ha ki hostel da ka jingai bor na ki bor pyniaid.
U la ong ba ki samla pule ki la kyntu ia ka bor pyniaid ban pynbun ia ki jaka sah sa ar tylli hynrei khlem urlong.
Phi don ban ong eiei?