Shillong,10 Naitung:
Ka Meghalaya for Indigeneous People Rights and Livelihood, kaba la khlieh da u bah Herald S Dkhar kum u Chairman bad u bah Kitbor C Rymbai kum u General Secretary, ka la ia kynduh ia u Myntri Rangbah ka jylla u Dr.Mukul Sangma ban ia kren halor ka jingshah ktah ki paidbah na ka jingkhang tih dewiong ka National Green Tribunal ha kane ka jylla. Katei ka seng kaba don lang ruh u bah Sing Mulieh kum u dkhot jong ka, ki la wanrah ruh sha u Myntri Rangbah ia katto katne tylli ki rai kiba la mih na ka jingialang pyrshah NGT kaba la long ha ka 4 tarik mynta u bnai ha Phra Mer, West Jaintia Hills.
Katto katne tylli ki rai katei ka jingialang ba ka MIPRL ka la wanrah sha u Myntri Rangbah ki long ba kin thaw ia ka Steering Committee ka ban pyrshah ia katei ka rai jong ka NGT, bad katei ka komiti kan lum ia ka jingpynsngew kiba bun na ki paidbah bad ban ia khun na ka bynta ka hok jong ki.
Ki la pyntip ruh sha u Myntri Rangbah, ba kum ka dak ka jingpyrshah ia ka jingkhang tih dewiong, shalan dewiong kin leit sha manla ki shnong ban phah soi kyrteng sha manla ki rangbah shnong ban pynpaw ba ki pyrshah ia ka rai ka NGT, bad katei ka jingsoi kan long ha ka dur jong ka phom ba katei ka seng kan leit ban ialap paidbah ban soi ia katei ka phom.
Ka la pynpaw ruh ba ka jingialang ka la rai ban pan por na u Member Secretary ka Meghalaya State Pollution Controll Board ban phah pynjlan por ha kaba ia dei bad ka Form I bad Form II kumba la hukum da ka National Green Tribunal, bad ka la iathuh ha u Myntri Rangbah ba ka seng kan pan jingpynshai halor katei ka Form I bad Form II.
Ka MIPRL ka la pyntip ruh sha u Myntri Rangbah ba kan phah da ka jingthoh sha u Under Secretary ka tnad Mining and Geology jong ka sorkar jyla ban pyntip ba ki paidbah ka Jaintia ki kyntait ia ka Form I. Ka la pynkhreh ruh ban phah da ka jingthoh sha u Myntri Rangbah Duh ka Ri u Narendra Modi ban tuklar halor ka jingkhang tih dewiong ka NGT ha ka jylla.
Ha kate ka jingiakynduh mynta ka sngi ia u Myntri Rangbah ka jyla ha Secretariat, ka MIPRL ka la pyntip sha u ba ki la don palat 1,50,000 ngut ki longing kiba la shah ktah jur ha katei ka jingshah khang tih dewiong. Katei ka seng ka la pynkynmaw ia u Myntri Rangbah ba ki jingkren u Chief Secretary ka jylla ba ka jingtih dewiong ha jylla kam dei kaba tih thliew khnai, hynrei kaba ki briew kane ka jylla ki tih katkum ka jingstad jong ki.
U dkhot kane ka kynhun u Bah Erwin K Sutnga u la ong ba kane ka kynhun ka la kyntu ia u Myntri Rangbah ban iasaid bad ka sorkar pdeng ba kan thaw ia ki lad ki lynti ban pynlait na kane ka jingshah khang dewiong thliew khnai ha kane ka jylla.
“U Myntri Rangbah u la iathuh ba ka sorkar ka dang thaw ia ki lad ki lynti kumno ban pynlait ia kane ka jingeh”, la iathuh u Bah Sutnga hynne ka sngi hadien ba la iakynduh ia u Myntri Rangbah.
Katkum ka jingong u Bah Sutnga, la iakren ba ka sorkar kam dei shuh ban pynjari da ki ain ban ktah ia ki trai jaka trai khyndew ha kane ka jylla.
“Ngi la iakren ba ka sorkar ka dei ban burom ia ki hok tynrai kum ki nongshong shnong kane ka jylla halor ka khyndew ka shyiap ba la pynkup da ka riti synshar ka ri ha ka 6th scheduled”, la ong u Bah Sutnga.
Ha kajuh ka por, u la ong ba donkam ruh ban iada ia ka mariang wat ka jingtih dewiong kan iaid bad ym dei ban leh pathar.
Ki dkhot kane ka kynhun, ki la pynpaw ha u Myntri Rangbah ba ka jinglong jingman ka la pynlong ia ki paidbah ban khie bitar bad ki la byrthen ruh ban pynlong ia ka jingiakhih lada ym lah ban weng ia kane ka jingeh.
Phi don ban ong eiei?