Shillong,17 Naitung:
Kawei ka liengsuin na Malaysia ka la bthei ha suin hadien ka jingshah siat da ki namding bad katei ka liengsuin ka la bthei ha ki bynta jong ka khappud ka Russia bad ka Ukraine. Katkum ka jingiathuh ki bor sorkar na Ukraine ki la iathuh ba ha katei ka jingjia ki la don haduh 295 ngut kiba iap.
Kitei ki 295 ngut ki kynthup ia 280 ngut ki nongleit nongwan bad 15 ngut ki nongtrei kiba don hapoh katei ka liangsuin. Ka MH 17 ka dei kaba la shah siat namding ka dei kaba la thmu ban leit sha Amsterdam bad ka la mih na Kuala Lumpur ha ka por shiteng sngi.
Na kiwei pat ki lad khubor, la iathuh ba katei ka liengsuin ka la jah rngai hajan Donetsk, ka jaka ba jur bha ka jingiakhun pyrshah ki kynhun iakhih na Russia pyrshah ia ka sorkar Ukraine.Ki la don ruh ki jingpyni dur ha ka TV ia ki tdem kiba mih na katei ka liengsuin.U namding ba la siat ia katei ka liengsuin la suba ba u dei u namding ba la rim bha ba la shna ha Soviet.
Halor katei ka jingjia la pyntip ruh sha u President ka Amerika u Barrack Obama ia ka jingtohkit ba dang iaid.Kham shuwa ia kane ki bor sorkar jong ka Ukraine ki la kam ba kawei na ki Jet ialeh thma jong ki ka la shah siat ha ka Russia.
Phi don ban ong eiei?