Shillong, 14 Nailur:
Ki paidbhur ka shnong ka Chokpot ki la tied jem ia uwei na ki dkhot jong ka seng runar ka Achik National Army ( ANA) bad ki la thang ia ka kali maruti jong katei ka seng hadien ba ki la dep pynjulor.
La iathuh kumba san ngut ki dkhot jong ka seng ANA ki la wan sha ka shnong Chokpot ban sam ia ki shithi dawa pisa bad ha kane ka por ki paidbah kiba la lap ia kane, ki la beh ia kitei ki dkhot bad ki la ioh kem ia uwei napdeng jong ki ha ryngkat bad ka kali Maruti (AS19- 7576).
Uwei u dkhot ka ANA ba la ioh bat, ki paidbah ki la tied bad bom jem haduh ban da mynsaw jur bad ba hadien ia katei ka kali la dep ban pynjulor ki la thang noh.
Katba uwei pat u dkhot uba la tip kyrteng kum u Sentu Marak hadien ka jingshah beh ha ki paidbah, u la mareh beit sha ka thanad bad lait na ka jingiap, katba kiwei pat ki dkhot ki la lait phet na katei ka jaka.
Utei u dkhot uba la shah tied ha ki paidbah, tip kyrteng kum u Rapseng Ch. Marak bad la khlad noh namar ka jingjur jong ka jingmynsaw.
Ha kaba iadei bad kane, na ka liang ki pulit ki dang pynlong ia ka jingtohkit ban lap ia ki jingshisha baroh ha kaba iadei bad katei ka jingjia.
Phi don ban ong eiei?