Shillong,9 Naitung:
Ka PHC Mawlasnai kaba don ha khappud ka Meghalaya bad Assam jong ka Mawhati Constituency ka thain Block II kam shym la don doktor satia bad ia kane la lap da ka CORP ha ka jingleit jurip jongka ia katei ka jaka sumar ia ki paidbah baduk nongkyndong.
Ka CORP ka la ong ba ha ka jingshisha ki shnong ba marjan ki ia leit ban shim dawai bad shah sumar ia lade ha ka pang ka shitom, hynrei sngewsih ba katei ka hospital mynta ka bun bun bnai kam don ki doktor satia bad ki paidbah haba ki leit ba shim dawai ki teng teng ki hap ban wanphai iing da ka diaw bad pangnud haba kim ioh dawai.
U Working President ka CoRP sengkmie Bah Bandary Ryntathiang ula ong ha katei ka hospital la phah tang da u doktor Ayush ban ai dawai bad une u doktor um wan thikna kumta ki paidbah ki shem jingshitom ban ioh jingiarap haba ki pang ne shitom, khamtam kito ki longiing kiba duk ki mad ia ki jingjynjar namar ban leit shah sumar ha ki kiwei ki hospital ruh kim kot bor.
“Ka sorkar ka dei ban shimkhia ban phah noh kloi ia ki doctor ha katei ka hospital khnang ba ki paidbah kin ioh lem ia ki lad jingiarap haba ki pang ki shitom khamtam ha kum ba kine ki por ba slap ki jingpang ba bun jaid ki shait jia,” ong u bah Bandary.
Ula ong katei ka hospital ka long kaba itynnad ka iing haduh ki jaka sah ki doctor bad ki nurse bad la dei ban ai ka jingiaroh ia ka tnad ka koit ka khiah lyngba ka Engineering Wing kaba leh bha ha ka jingshna, hynrei haba phai ha ka liang ki nongtrei ka dang duna shibun naduh ki doctor haduh ki staff. “Kam myntoi ban pynitynnad ia katei ka hospital haba kam lah ban iarap kiba pang ba shitom” ula bynrap.
Na ka liang ka seng, ka kyntu ia ki bor sorkar bad kumjuh ruh ia ki nongmihkhmat MLA/MDC ba kin shimkhia ban iakren bad ka sorkar ban phah doctor ha katei ka hospital na bynta ka jingbit jingbiang u paidbah.
Phi don ban ong eiei?