Shillong, 17 Jylliew:
Ki khynnah skul ka Williamnagar ki la duh shong klas namar ba ia ka skul jongki, la pyn shong da ki shipai BSF, COBRA, SWAT bad ki pulit ban iakhun lehnoh.
Kine ki pulit CRPF, COBRA, SWAT bad kiwei ki pulit kila pyndonkam ia ka skul naduh ka 3 tarik Rym phang.
Kane ka jingshah knieh jong ki khynnah ia ka hok ban pule ka dei ha ka skul Bolkinggre Secondary School ha East Garo Hills kaba don shiliang ka wah Simsang na Williamnagar.
Ka jingpynshong ia ki bor pahara slem ha katei ka skul ka la pynduh ia ki khynnah ban ioh pule bad pynthut ia ka jingpynlong klas. Ka GSU ka la sei madan ia kane bad ka la ong ba la pyndonkam da ki bor pahara ia katei ka skul khlem ka jingbit na u District School Education Officer (DSEO) bad na ka School Management Committee.
Haba pyntip ia ka jingpynbna ba la ai da u DSEO ba baroh ki skul ki dei ban pynlong ia ka eksamin shiteng snem hapdeng u Jylliiew, ka GSU ka la kdew ba ki khynnah pule katei ka skul ki la duh ia ka jinghikai la shiteng snem.
Katei ka skul ka long kaba ai ia ka jinghikai ia ki khynnah katei ka thain kaba long kaba ma bha bad ka jingbym lah jongka ban ai jinghikai kan ktah jur bha ia ki khynnah, la ong u Additional General secretary ka GSU, u Frenky N Marak.
Ka GSU ka la iathuh ba ia kane ka kam la rah sha ka jingtip jong u Deputy Commissioner ka East Garo Hills bad la phah ia ka shithi sha ka myntri kam pohiing ka jylla da ka School Management Committee hynrei khlem leh eiei.
Halor kane, ka seng ka la thoh biang sha ka myntri kam pohiing ka jylla da kaba ai por hynniew sngi ban leh eiei ban kynriah noh ia ki BSF, COBRA, SWAT na katei ka skul Bolkinggre Secondary School bad lada kam lah, ka seng kan leh da ki kam.
Phi don ban ong eiei?