Shillong, 15 Lber:
Ki nongkyrshan ka seng NPP ha ri Lum Garo mynta ka sngi ki la shong kyraiñ ha phyllaw ka GHADCban pynpaw ia ka jingpyrshah ia ka sorkar jylla kaba la mynjur da ka kyrteng ka Selma D Shira kum ka MDC shu sieh ha ka jaka u Conrad Sangma uba ka District Council ka la ibit. Ki paidbah kiba la wan sha katei ka jingiakhih ki la kynnoh ba katei ka jingleh ka sorkar ka dei ka jing pyniap ia ka synshar paidbah bad ka dei beit beit ka jingpynkheiñ ia ki aiñ ka GHADC kaba la ong ba ban jied ia u MDC shu sieh ka shong ha ka bor jong ka Executive Committee bad dei ban ioh jing mynjur na ka sorkar jylla bad ban mynjur ruh da u Lat ka jylla.
Ki nongiakhih ki la pyrta da ki jingpyrta kiba pyrshah ia ka Selma bad ki la dawa ruh ba dei ban weng noh ia ka kyrteng jong ka. U CEM ka GHADC u Augustine Marak u la kynthah ia u myntri rangbah ka jylla u Dr.Mukul Sangma ha kaba u la ong ba u myntri rangbah u tip bha ia ka Aiñ, hynrei katei ka jingleh jong u ka dei ka jingleh khnang tang ban ioh pynhap ia ka EC kaba mynta kaba bat ia ka bor synshar kaba ialam da ka seng NPP.
“Ka ka bat ia ka bor synshar ha ka sorkar pdeng, hato ka la ju pyni mo ba ka kwah ban pynghap ia ka sorkar Meghalaya ba synshar da ka seng Congress, balei pat ka seng Congress ka kwah pynhap ia ka sorkar ha GHADC” ong u Augustine Marak uba la ong ba ka NPP kan leit ban ujor sha u Lat ka jylla pyrshah ia ka tei ka jingleh ka sorkar jylla.
Phi don ban ong eiei?