Shillong:U Myntri ka tnad ka koit ka khiah, u Bah Alexander L Hek, u la iathuh ba ka sorkar ka la thmu ban pynkynriah noh ka Shillong Medical College sha Umsawli, hynrei na ka daw ba don ka khlam Covid -19 kane ka kam kan dang sah teng.
Haba iakren bad ki lad pathai khubor, na ka liang u bah Hek, u la ong halor ka Fees Structure kaba ka KBC Company ka thmu ban pynkiew noh na ka T 3 lak sha ka T.10 lak, na ka bynta baroh ki course ban pule doctor, la iathuh ba kat kum ka jingthmu ba ka KBC ka la phah sha ka sorkar, ka long ba kane ka fees structure kaba la soi naduh u snem 2012 ka ba long T3 lak bad mynta kane kan ym lah ban pyniaid shuh ha kaba ka phah sha ka sorkar ban pynkiew noh sha ka T.10 lak ban pyndep ia ka Course Doctor.
U la ong ba halor kane ka bynta ban pynkiew haduh T.10 lak ha kaba na ka liang ka sorkar ka la ong ba kan sa bishar bha, namar ban shu pdiang ia ka rai ba kin pynkiew haduh T.10 lak, yn ym pat lah ban pdiang bad ia ka ne na ka liang ka sorkar kan hap shim ia ka rai ban pynkiew hynrei ka jingpynkiew kan long kaba ia biang lang baroh arliang.
“Ka sorkar kan don la ka jong ka jingpyrkhat ha ka ba kan ym lah ban ia mynjur lang mynta ngin hap jubab shuwa ia ka shithi jong ka KBC bad ban pan jingmut lang na ki bad ban iabiang lang la ki pdiang ne m ia ka rai ka sorkar” u la ong.
U la iathuh ruh ba halor ka Shillong Medical College ia mynta hi kaba la ia beit ka long beit tang ban pynkynriah sha Umsawli.
U la ong ruh ba ban tei ia kane ka jinglut kaba la mang ha Mawprem kadei kum ba T.300 klur hynrei mynta ym pat lah ban batai bad kane kan ym hap hapoh ka jingpeit jong ka sorkar, hynrei kan tip hi ka KBC Company.
u la ong ruh ba ha ka ne ka soskular ka ba la iateh ka long na ka bynta ka 33 snem ka ne ka Company kan peit kan pyniaid hi ia ka ne ka SM College. Ha ka ba ia dei na ka bynta ka Tura Medical College haduh mynta 13 % ka kam ka la iaid bad ia ka ne ym pyndep 4 snem tam namar ka jingpynthud jong ka khlam bad kiwei kiwei.
U la iathuh ruh ba kat kum ka kyndon jong ka Medical Council Of India, ka jaka ban shna ia ka Medical College kam dei ban duna ia ka 20 akar bad ka Umsawli TB Hospital ka don tang 17 akar bad halor kane la dep ban thoh ia ka urban Affair ban ai ia ka jaka sa 5 akar na ka bynta kane ka College.
Phi don ban ong eiei?