Shillong, 13 Lber:
Ka jingiaseng synod kaba khadsaw jong ka Khasi Jaintia Presbyterian Synod Sepngi (KJPSS) ka la long ha ka Balang Kynshithem, kaba hapoh ka Kynshi disrict Mairang Presbytery ka la sdang naduh ka 10 tarik Lber bad kaba la kut noh mynta ka sngi ka 13 tarik Lber.
Ha katei ka jing iaseng Synod da ki phew hajar ngut ki paidbah ki la tuid na kylleng ki jaka kiba hap hapoh ka Synod Sepngi, kumjuh ruh wat na kiwei Synod ki la poi ha katei ka jingiaseng bah. Ha katei ka sngi la ioh sngew ia ki arngut ki nongkren kiba la ialap ia ka ktien u Blei, ha ka jingiaseng ba 10:30 baje mynstep la ioh sngew ia ka jingialap na u pastor P.S Nongphlang bad ha ka jingiaseng ba 1:30 baje nohphai sngi na u pastor D.S Sohkhlet
Ha ka jingiaseng kaba mynstep laioh ia ka jingkren na u pastor P.S Nongphlang. Ka phang pdeng kaba u la kren ka long shaphang ka “Jingshah hikai bakla ha ki nongiathuh lypa ne nongialap niam” ia kaba u tei u pastor u la pynshong nongrim na ka ktien jong u Blei na u Judah 1:3 bad kaba 4. Utei u pastor u dei ruh u Moderator barim ka Ri Bhoi Presbyterian Synod u ba long ruh u wei na ki pastor rangbah ha ki snem ba lah jong ka Ri Bhoi Synod.
U Pastor D.S Sohkhlet u la ai ia ka jingkren ha ka jingiaseng kaba ar, u la kren ia ka phang pdeng shaphang ka ‘bneng’, ki briew kiba kumno kin ioh ban shong ha bneng kaba u la pynshong nongrim na ka shithi sha ki philiphi 3:20 kaba ong, “Namar kata ka jinglong traishnong jong ngi ka long ha Bneng; nangta ruh ngi ia ap khmih lynti ia U Nongpynim, U Jisu Khrist Uba U Trai”.
Haba pharia ia katei ka bynta, u Pastor Sohkhlet u la ong ba ka Bneng ka long ka Nongbah kaba Khuid kaba dei tang ki riewkhuid kiba lah ban shong ha ka, ka long ka Nongbah kaba U Jisu Khrist U long U Syiem jong Ka bad ki Angel kum ki nongap pahara lem bad ki jingtei kynroh kiba skhem bad ka khyrdop ha ka.
U la ong ruh ba ki briew kiba don hapoh jong ka kin ym iap shuh lano lano ruh, kiba kup ia ka jinglong samla shilynter bad kin ym tymmen shuh, bad kiba la ioh ruh ia ka jingsait da ka snam bakordor jong U Khrist kum u Trai bad U Syiem jong ka.
Ka Bneng kan ym lah ban ai jaka rung ia riew bymman bad kam pdiang ia kiba leh kam sniew, bad kita ki kam sniew u Pastor u la ong, ba ki dei ki kam bamsap, kiba buaid, kiba khwan ia ka bhah kiwei pat bad wat ia ki nongialam Balang ruh u Pastor u la tied tyngeh ba kin ym ioh jaka ha Bneng lada ki iai bteng ia ki kam pynpait Balang ban pynsakma kai ia ki langbrot kiba ki dei ban sharai hapoh jong ka, kaba ia kane u la ring dur na ka Shithi ba nyngkong sha ki Korinth 6:9 bad 10.
U la pyniasyriem ba ka Bneng ka long kum ka iinglieng u Noah, kaba pdiang ia kaba khuid hapoh jong ka bad kaba kyntait ia ki bym khuid ban pynkhuid ia ka jingsniew jong ka pyrthei.
Ha katei ka jingiaseng bah la iohsngew ia ki sur jingrwai na ki khun samla ka Balang kiba kynthup ia ka Balang Nongjri (Mawbuh Ri-Bhoi Presbytery), ka Balang Lyngkhom, ka Khasi Jaintia Presbyterian Synod Sepngi Standing Choir bad ka Balang Kynshithem, balang Presbyterian Nongryngew, balang presbyterian Mawprem bad na ka jingiaseng khynnah jong ka balang Kynshithem.
Phi don ban ong eiei?