Shillong, 16 Jylliew:
U Symbud Myntri Rangbah ka jylla ba peit ia ka tnad elekshon u Bah Rowell Lyngdoh u la iathuh ba ka sorkar jylla ka la iakhun pyrshah ia ka rai jong ka High Court ka Meghalaya ba ki nong-Bangladeshi kiba rung shwa ka 24 tarik Lber, 1971 ki dei ki nong- India.
“La iathuh ia nga ba u Deputy Commissioner ka Ri-Bhoi u la ujor pyr shah ia ka rai jong ka High Court”, la ong u Bah Lyngdoh haba jubab ia ka jingkylli ba la wanrah da u MLA ka Sohra u Bah Titosstarwell Chyne ha poh ka iing dorbar thawain hynne ka sngi.
Shwa ia kane, haba wanrah ia ka Call Attention Motion, u Bah Chyne u la ong ba ka sorkar jylla ka dei ban ujor ia kane ka rai jong ka High Court sha ka Division Bench ban pynduh noh ia katei ka rai mardor.
U MLA ka Sohra u la ong ban a ki 29 lak ngut ki nongshong shnong ka jylla katkum ka khanasumari 2011, ki Khasi-Jaintia ki don tang 47 percent katba ki Garo ki don 27 percent.
Katkum ka jingong u Bah Chyne, ka rai jong ka High Court ka dei ka kam kaba sngew khia jur ia ki trai nongshong shnong kane ka jylla.
“Ngi tip ba ki sengbhalang ki iakhun pyrshah ia ka jingwang rung ki briew nabar kum na Bangladesh. Da kaba ai ia ka bor da ka ain ia ki briew kiba shu wan rung beain, kan wanrah ia ka jingma shuh shuh”, la ong u Bah Chyne.
U Bah Chyne u la ong ba la don shibun ki politishian kiba iarap ia ki Bangladeshi kiba wan rung beain tang ban ioh vote.
‘Ha nga shimet, nga sngew ba ngam kwah ban shah jied nongmihkhmat da ka vote ki bar jylla ba wan rung beain ha kane ka ri”, la ong u bah Chyne.
“Ngi tip ba ka don ka shnong ki Bangladeshi ha kane ka nongbah kaba la tip kum ka Bangladeshi Colony. Kane ka pyni ba ka jinglong jingman ka long kaba ma bha”, la ong u MLA ka Sohra.
Phi don ban ong eiei?