Nongpoh:Ki nongialam ka HYC Ri Bhoi District, hynnin ka sngi ki la leit ban kynduh ia ka Kong RM Kurbah, Deputy Commissioner ka Ri Bhoi bad phah ruh da ka dorkhas, na ka bynta ban dawa na ka ba ka dei ban phah pynsangeh noh mardor halor ki kam khlong maw beain hapoh ka Wah Umiam bad kaba don ha ki shnong kiba don hapdeng ka shnong Mawrathud bad Birsiej ka thain Mawhati.
Ha kaba leit ban kynduh ia ka Kong RM Kurbah, la ialam da u Bah Hercules Suting, General Secretary ka HYC ha Ri Bhoi, nangta u Bah Shanbok H. Marsynting, Secretary ka HYC Mawhati Circle lem bad kiwei pat ki dkhot ka seng.
Haba kren sha ki lad pathai khubor, u Bah Hercules Suting, u la ong ba kaba la pynlong ia ka seng ban leit ujor syndon sha ka DC, ka dei hadien ba ki la lap bad iohi ba ka jingkhlong maw beain hapoh katei ka wah ka la long shaba palat u pud, namar ka rukom khlong ia ki maw, la pyndonkam da ki bor mashin bad kaba la ktah ruh ia ka jinglong jingman jong katei ka wah.
Ha ka jingkren sha ka DC, kitei ki nongialam ka HYC, ki la pynpaw ia ka jingsngewkhia ban iohi ba kum kitei ki kam kiba pynjot ia ka mariang ki jia hapoh katei ka wan bad ka rukom khlong maw ruh kam dei na bynta ka jingdonkam jong ki paidbah, pynban la lap ba ka dei tang ka kam kamai shimet da mano re mano, ki briew kiba ka seng hi kam pat kwah ban pynpaw kyrteng. Haba iadei bad kitei ki jingujor da ka HYC, ka Kong RM Kurbah, ka la kular ban shimkhia bad ruh ka la shim ia ka rai ba kan pynlong ia ka Joint Inspectiong ne ka jingleit jurip lang sha katei ka jaka, kaba la kdew da ka HYC ba ka don kata ka jingkhlong maw beain bad kaba la pynjot ia katei ka Wah Umiam.
Phi don ban ong eiei?