Shillong, 14 Naitung:
Ka UDP ka la rai ban buddien beit ban sei madan halor ka jingdonkti jong ki politishian bad ki seng lehnoh ha Garo Hills.
Haba kren bad uwei u nongialam ka UDP u la ong ba ka jingpaw pyrthei halor ka jingkynnoh donkti jong ki politishian bad ki lehnoh ka long ka kam kaba khia haduh katta katta namar ba ka ktah ia ka jylla hi baroh kawei.
“Ngi la dep ai jing thoh sha u Myntri Rang bahduh ka ri halor kane bad ngi kyrmen ba ka sorkar pdeng kan leh eiei khnang ban sei madan ia ki jingshisha halor kane ka kam”, la ong uwei u MLA jong ka UDP.
Ka UDP bad ka NPP nalor ki MLA shimet ki la rah ruh ia kane ka mat hapoh iing Dorbar Thawain dang shen ha kaba ki la dawa ba dei ban thung da ka jing tohkit kaba laitluid ban wad ia ka jingshisha khamtam hadien ba la mih ka jingkynnoh ba u khlieh jong ka sorkar u Myntri Rangbah u donkti bad ki seng lehnoh.
Katkum ka jingong jong une u MLA ka UDP ka party kan nym shongthait ban buddien ia kane ka kam haduh ban da lap ia ka jingshisha.
Ka jingkylla ka sorkar ha Delhi ka la kham ai mynsiem ia ki party riewlum ba don ha kane ka jylla kaba synshar da ka Congress katba ha sorkar pdeng la synshar da ka BJP.
“Ngi donkam ia ka jing tuklar ka sorkar pdeng khnang ban sei madan ia ka jingshisha halor ka jingkynnoh ka jingdonkti ki politishian bad ki seng lehnoh namar ba ki briew kiba shah kynnoh ki don ha ka bor synshar bad kam long kaba suk lap ia ka jingshisha “, la ong shuh shuh une u nongialam ka UDP. Kham mynshwa ka UDP bad ki paralok liang pyrshah jong ka, ki la dawa ba u Myntri Rangbah ka jylla u Mukul Sangma u dei ban hiar shuki noh hadien ba u la shah kynnoh ba u ia don kti bad ka seng lehnoh.
Phi don ban ong eiei?