Umsning, 17 Naitung:
Ka Nongpoh Sumo Owner’s & Drivers Association (NSODA), ka la pynlong ia ka jingialang paidbah jong ka na ka bynta baroh ki draibar Sumo kamai na Umsning sha Shillong ha kaba la wan shim bynta lang ruh da ki lai tylli ki Unit jong ka, kiba kynthup ia ka Umsning, Nongpoh bad Mawhati.
Ha katei ka jingia lang la shim ia ka rai ba baroh ki draibar ki dei ban phong ia ki uniform ba la sam paidbah sha ki mynta ka sngi kaba long ka jingsdang pynithuh ialade ba ki dei ki draibar kali kamai da kaba kin phong ha ka met jong ki da kitei ki uniform.
U chairman ka Umsning Town Durbar (UTD), u Bah Rocky Kylla, u la long u Kongsan bad ha ka jingkren jong u, u la maitphang ia lai tylli ki bynta ba ki draibar ki dei ban don, kata ka long ba ka jingiatylli, ka jingkitkhlieh bad ka jingiatreilang.
U la ong ba kum ki draibar ki dei ban don ia kitei ki lai tylli ki bynta kaba long kum ka jingiatreilang bad ki paidbah nongshong kali kamai na ka por sha ka por. Kawei ka mat ba u Kongsan u la ban bha ha kane ka sngi ka long ba ki draibar kim dei ban kit kyiad ha ki kali ba ki kamai, khnang ba kan long ka jingiarap ban wanrah ia ka imlang sahlang kaba bha.
La sakhi lang ruh ha kane ka sngi da ka jingdon lang u Bah D Syiem, president ka FKJGP, Umsning Circle lem bad ki nongkitkam ka NSODA.
Na ka liang ki nongialam ka NSODA ki la buh ryntih ruh ia ki kyndon ba ki draibar ki dei ban bud hadien ba la sam sha ki ia ki uniform, kita ki long, ba ka jingkup ia ki uniform ka dei ban ithuh ba ki dei ki draibar bad kiba la biang ia ka license, la mana ruh ba kim dei ban ai kylliang ia ki uniform sha kiwei pat ki draibar khlem ka jingbit na ka Unit ne Association.
Ki draibar kim dei ruh ban phong kulmar ia kitei ki uniform kum ha ki jaka paidbah bad ki jaka dih kyiad bad ki draibar ba khlem uniform kim lah ban thep pasenjer bad ia kine ki kyndon la phah kopi ruh sha ki SP jong ka Traffic Police (Nongpoh bad Shillong) kum ka jingpyntip ba kin leh ia kaba donkam.
Ki draibar kiba pyndonkam hok ia ki uniform kin ioh ia ka 10% medical allowance lada ki mad ha ka pang ka shitom bad yn pynduh ia ka hok jong ki lada kim phong ia ki uniform bad ka Association ka don ia ka hok ban pynshitom ia kito kiba pynkheiñ ia kitei ki kyndon ba la buh haneng.
Kiwei pat ki kyndon na ka bynta ki draibar ki long ba kim dei ban dih sikret ha kali, ne ki jingdih ba buaid, kim dei ban pynher stet ia ka kali palat ia ka 50 km/hr, kim dei ban kren ktien sih ne khlemakor, kim dei ban phong da ki slipar, hynrei da ki juti, ki dei ban kiar na ka jingthep khapngiah khamtam ha ka seat ba hakhmat duh, kin kiar na ka jingshim khmat (over take), ki dei ban iarap ia ki riew kynthei ban kyntiew ne pynhiar ia ki mar, ki dei ban pynieng ia ka kali kham sharud ka surok ha ka por ba ki pynhiar pasenjer bad kim dei ban shim kabu ban kyntiew bai kali lada jia ba duna kali kamai bad kiwei kiwei ki kyndon ba la teh ia ki.
Phi don ban ong eiei?