Shillong,14 Naitung:
Ka kynhun ki seng bhalang ka thain Ri Bhoi sepngi hapoh ka lama ka Western Ri Bhoi Joint Action Committee WRB-JAC) ka ai por shitaiew ia ki kompani mobai kyn thup ka Reliance, Aircel bad cellone ban pynbiang ia ki network ha ki tower ha shnong Umrit, Pahthar khmah, Warmawsaw bad Jirang.
U chairman katei ka kynhun u Bah Najim Khar malki, u la ong lada kitei ki kompani kim lah ban pynbiang ia ka network hapoh shitaiew ka JAC kan sa leh da kaba tyngeh ban rat syndon ia kitei ki tower, namar kitei ki kompani kim sngap satia ia ka jingud jingnam jong ki paidbah kumta ka bha ba kitei ki kompani kin weng hi noh ia ki tower shwa ba kin shah pynkhyllem ha ki paidbah.
U Bah Najim ula ong ba la thait ban iakren ia ka jingduh network ki tower mobai kaba la buh ia ki paidbah ha ka jingeh ban pyndep ia ki kam ki jam, khamtam eh haba don ba pang ne shitom kim ioh lad satia ban phah khubor ne pan jingiarap na bynta ki kali kit nongpang bad wat ban phah khubor ia kiba haiing hasem ne khun ha shillong ruh ki shem jynjar namar ba kitei ki tower kim don network satia la bun bun bnai. Shuh shuh ula ong, ha kaba iadei bad kiwei kiwei ki mat ka JAC kan sa leit ban ai da ka dorkhas sha ki tnad treikam ka sorkar jylla ban pynpaw ia ka jingeh ki ki paidbah bad kan nangiai bud dien ruh ia kiwei ki kam pynroi ha ka thain na bynta ka bha ka miat uba bun ba lang.
Phi don ban ong eiei?