Nongpoh, 14 Naitung:
Ki pulit ka Assam ki la pynpra ia ki katto katne tylli ki ïing ha ka shnong Khanapara, Ri-Bhoi district mynta ka sngi, kaba kum ki bor shnong ki la pynpaw ia ka jingpyrshah jur halor katei ka kam pynpra ïing, la ong u Bah Jeromi Lyngdoh, Rangbah Shnong ka Khanapara.
Katei ka jingpynpra jong ki pulit ka Assam ka la sdang shuwa na ki pud ka Assam hi ha kaba ki la pynpra naphang lin bad ki la wan ruh sha ki pud ka Meghalaya ban pynpra ia ki dukan jong ki briew kane ka jylla.
U Rangbah Shnong ka Khanapara, u la ong ruh ba ka shnong ka thaw baroh kawei ka sngew lyngngoh halor katei ka jingleh donbor jong ka Assam, kaba khlem da pyntip sha ki bor shnong ka la shu wan pynpra beit ia kit ei ki dukan bad ki ïing kiba don hapoh u pud u sam jong ka jylla.
Ki pulit ka Khanapa ra bad ki magistrate ka district ki la hiar mar mar sha katei ka shnong hadien ba ki la ioh jingtip ban pynlong ia ka jingtohkit bad haba la pyrshang ban wad jingtip pat, ka long kaba sngewlyngngoh ba ki bor district ki la ong pynban ba kitei ki ïing bad dukan ba la pynpra kim hap shuh sha Meghalaya hynrei ki la hap sha Assam bad dei na kata ka daw ba ki pulit ka Assam ki la pynpra ia ki ban khanglad ia ka jingtei beaiñ ha ki nala um kaba long ka daw jong ka jingshlei um ha ka jylla Assam.
Hadien kane ka jingjia, na ka liang ka KSU North Khasi Hills district Unit, haba la ioh iakren bad u Samla Vincent Makri, general secretary, ka seng ka la dawa ba ki bor district bad kumjuh ruh ia ki bor ka Khasi Hills Autonomous District Council (KHADC) ba ki dei ban tuklar mardor halor katei ka kam pynpra ïing bad dukan ki pulit Assam kiba la wan pynpra jubor kumba la kam da u Rangbah Shnong ka Khanapara ba ki dang hap hapoh u pud u sam jong ka jylla.
U Samla Makri u la ong ruh ba ka seng hi kam kwah ba wat tang shi inshi ka khyndew ka shyiap jong ka jylla kan hap sha Assam bad u la ong ruh ba lada ki bor district bad ka KHADC kim lah ban shimkhia halor kane, na ka liang ka seng kam banse ban shong pyrkhat kam bad ban shim da ki lad ki lynti kiba tyngeh syndon halor kine ki jingjia leh donbor bad thombor da ki jylla kiba na shabar.
Phi don ban ong eiei?