Shillong, 12 Jylliew:
Ka myntri kam poh iing ka jylla ka Kong Roshan Warjri ka la ong ba la don 12 ngut ki briew kiba iap ha phatok ki pulit ha kine ki san snem ba la dep.
“Na kine ki 12 ngut, hynniew ngut ki iap dei ba pyniap hi”, la ong ka Kong Warjri haba jubab ia ka jingkylli ba la wanrah da u nongialam liangpyrshah ha iing dorbar thawain hynne ka sngi Palei.
Ka la iathuh ba san ngut ki iap ha u snem 2013, lai ngut ha u snem 2014, lai ngut ha u snem 2009 bad uwei ha u snem 2010.
Kine kiba pyniap hi katkum ka kaiphod ba la wanrah ka sorkar ki long u Yeangthin R Marak, Sngewlemmi Kharsati, Tony Peter Kharbithai, Dilip Dohkrud, Roy Symbli, Tapo A Marak, Naresh Koch, Kitbok Kassar , Dapahlan Salanki Rupon, Yonder Mawleiñ, Nalchand Ali bad u With son M Sangma. Ka myntri ka la iathuh ba ka sorkar ka la thung ia ka jingtohkit da u majistret halor kine ki jingjia.
Haba kubur ba ka long ka kam kaba sngew khia jur haba jia kum kane, ka Kong Warjri ka la ong ba ka tnad pulit kan pyrshang ban wad bniah ia kine ki jingjia. Ka la ong ba ka don ka jingthmu ban buh CCTV ruh ha ki jaka set ha ki pulit station. Katkum ka jingong ka Kong Warjri kine kiba pyniap hi ki pyndonkam da ki patlun pyjamas. Hynrei kane ka jubab ka la pynlyngngoh ia u MLA ka NPP u James K Sangma uba la pynpaw ba ka long ka bym lah long ba kin pyniap da kaba phasi da ki patlun pyjama.
Phi don ban ong eiei?