Shillong, 11 Naitung:
Ka jingtohkit ba la thung da ka Meghalaya State Women Commission (MSCW) ba kynthup ia ar ngut ka dkhot ka vice-chairperson ka Gamchi Marak bad ka Angela R. Ingty halor ka jingshah pynshitom ki 12 ngut ki kynthei ha Tura namar ka jingkynnoh donkti kam awria, ka la ong ba ia kitei ki kynthei la shu shim bad rah na surok ha kali ha Chaingre, Orchid Lodge ha Asanang bad ruh la leit sei na iing jongki.
Kane ka Komishon ka la eksamin ia ki 44 ngut ki briew kynthup na kitei ki 12 ngut ki kynthei, ki kmie ki kpa jongki bad ki nongshong shnong bad ki pulit. Katkum ka jinglap kane ka komishon kaba la pynlait ha kane ka sngi Thohdieng, la pynpaw ba kitei ki 12 ngut ki kynthei la set beain ha ka iing wai jong ka Jaynie Ningring Sangma ha Daldagre ha Tura naduh ka 1 tarik haduh 8 tarik Jymmang.
“Na ka jingiathuh jong kitei ki kynthei, la shu rah bad set beain ia ki bad la pynshitom ha ka bor jabieng bad ia ka bor met jongki ruh bad ki la shah byrngem ruh ha ka kyrteng ka GNLA bad ia kane ka kaiphod la aiti sha u Principal Secretary ka Social Welfare department dang shen.
Bun kiba sakhi ki la pynthikna ba ka jingpynshitom, ia ki kynthei da kaba shoh kaba tied, pyntieng, byrngem.
“Kawei ka kynthei ka la mut ban phasai ialade namar kane ka jingshah leh hynrei donbok la ioh ban khang lad noh”, la ong ka kaiphod ka Komishon.
Haba kdew ia ka jingkynnoh donkti jong ki sengbhalang bad ki katto katne ki pulit, ka Komishon ka la ong ba u SP ka West Garo Hills u SP Mukesh Singh um shym tip ia kane.
“Ka jingiadei kam shym la don ban pyntip sha kiba heh halor kane ka jingjia. U pulit Circle Inspector BN Marak ka Tura um shym la iaid katkum ki ain bad u la leh tang da ka jingsngew khlem pynshisha ia ka jingkam jong ki sengbhalang kiba donkti ban pynshitom ia ki 12 ngut ki kynthei, la ong ka Komishon.
Katkum ka jinglap ka Komishon, utei u Inspector ym shym la phah ia kitei ki kynthei sha ka Women Cell ka Police station, hynrei u pyntip sha ki sengbhalang bad aiti ia ki sha ki, bad kane ka long kaba beain.
“Ka jingbym lah u Circle Inspector ban leh katkum ka ain ka la pynjyrwit bad kyllain ia ka kam”, la ong ka Komishon.
“Ka la don ka jingpynkhein ia ka hok briew man briew ia ka jingpynshitom ia kitei ki kynthei”, la ong ka Komishon.
Ka Komishon ka la ong ba u deputy commissioner ka West Garo Hills u Pravin Bakshi um shym la tip bha bad um tip ba ka Jaynie bad ka kynhun ki la set ia kitei ki kynthei. U Bakshi u shu tip ba ka Jaynie bad kiwei ki ai konseling ia kitei ki kynthei.
U Deputy commissioner u la ai jingmut ia ki lad pathai khubor ban iatreilang bad ki pulit ha ka por ba pynlong ia ka jingkhynra hynrei kane kam shym la urlong bad kane ka pyni ia ka jingbym don ka jingiadei kaba biang hapdeng ki pulit bad ka bor synshar district, la ong ka Komishon.
“Ki Balang ruh ki la shu tur ruma khlem da tip ia ki ain ba iadei bad ki kynthei. Khlem da pynshisha eiei, ki la shu pynlong ban ai konseling ia kitei ki kynthei” la ong shuh ka Komishon.
Ka Komishon ka la ong ba katkum ka jinglap, ka jingpynshitom ia kitei ki kynthei, la leh ha iing ki sengbhalang, ym ha police station. Ha kajuh ka por, ka Komishon ka la ong ba bun bah ki kam beain kiba jia ha Tura District Jail ha kaba ki koidi ki ioh ban pyndonkam mobai phun katba mon.
Ka la ong ruh ba ki koidi ki la shah shoh hapoh phyllaw ka phatok hynrei ki bor ba dei peit kane ka phatok kim shym la leh eiei ban shim khia ban pyntip sha kiba heh. Ka vice-chairperson ka Commission ka Gamchi Marak ka la ong ba kim shym la lah ban pynshisha la kine ki kynthei ki khaii met shisha ne em.
Phi don ban ong eiei?