Shillong, 11 Naitung:
Ban lait na ka jing kyrduh, ka jingkhuslai bad ban ioh ia ka jingkmen bad ka jingsuk, dei ban thaw ia ka longiing kaba rit. Ia kane ka sur la pynsngew ha ka jingrakhe ia ka sngi u bynriew ha ka pyrthei kaba long hynne ka sngi ha Ganesh Das hospital, Shillong.
U Deputy Commissioner ka East Khasi Hills u Sanjay Goyal haba kren kum u kongsan ha kane ka jingialang, u la ong ba ka jingbun briew ka ktah ia ka ioh kot ka koit ka khiah bad ka roi ka par jong ka ri bad ka jaitbynriew. U la ong ba ka la dei ka por ia ki briew khamtam ia ki shi jur ba kin jied ban thaw ia ka longiing kaba rit ban lait na ki jingeh.
Ha kane ka jingia lang, kiba bun kiba wan ban sngap ki dei ki long kmie bad tang khyndiat eh ki shynrang.
Ha ka jingshisha, kum kane ka prokram ka long kaba donkam ba ki longkpa bad ki longkmie ba kin wan ban shah shkor bha.
U Goyal u la ong ba ka kamram kaba kongsan ban pynphriang ia kane ka khubor ka long ban leh da ki nongtrei ka tnat ka koit ka khiah, ryngkat ka jingiatreilang ka shnong ka thaw, ki longiing longsem. Ban pynduna khun, donkam ia ka jingiatreilang hapdeng ka lok bad u lok, ban shim ban pyndonkam ia ki lad jinghikai ba la ai da ka sorkar lyngba ka tnad ka koit ka khiah.
Shwa ia kane, ka Kong Patricia Mukhim ka la ong ba ki kynthei bad ki shynrang kim dei shuh ban lehrain hynrei ki dei ban shim ia ka jinghikai ba la ai da ka sorkar na ka bynta ban pynduna khun.
“Ngim dei ban lehrain, hynrei dei ban shim ia ka jinghikai ka koit ka khiah”, la ong ka Kong Mukhim.
Ka la ong ba lada thaw ia ka longiing kaba rit, yn ioh ia ka jingsuk namar ba lah ban iasam lang wat tang i jingbam ba khyndiat ruh.
Hynrei ha kajuh ka por, ka la pynpaw ia ka jingsngewsih ia ka jingkynrei ka jingshongkha khynnah. Katkum ka jingong ka Kong Mukhim, bun ki kynthei kiba dang dei ban leit skul, leit klas hynrei ki kdat noh sha ka lynti ka shongkha shongman bad kum ia kane, dei ban kiar.
La ioh ruh ia ka jingkren na ki doktor kiba pynshai ia ka jingdonkam ban seng ia ka longiing kaba rit. Na ka bynta kito kiba kwah ban ioh jingtip bad jinghikai, ka tnad ka la buh ruh ia ki briew na ka bynta kane ka jingthmu ha katei ka hospital.
Phi don ban ong eiei?