Shillong, 09 Nailur:
Ia ka jing tyrwa bym shaniah shuh ia u lam-phang dorbar Jylla, U AT Mondal, ba la wanrah da ka liangpyrshah Meghala-ya People Forum (MPF), la pdiang mynta ka sngi.
Ia ka jingbym sha-niah shuh ia u Lamphang ka iing dorbar la wanrah da u James K Sangma ka NPP ba la kyrshan da 8ngut ki MLA ka UDP, 4 ngut ki MLA HSPDP. Baroh kiba kyrshan ia kane ka jing bym shaniah shuh, ki don 12 ngut bad katkum ka ain pyniaid dorbar, ka jingdon jong ki MLA ba kyrshan ia katei ka jing ia tai nia, ka la long kawei na ka san bynta kaba la biang ban pdiang ia ka.
Haba pyntip hapoh ka iing dorbar halor kane, u Lamphang u Mondal u la ong ba u la ioh pdiang ia ka shithi na u James K Sangma ha ka 30 tarik Nailar kaba la pynpaw bym don jingshaniah shuh ia u Lamphang ka ing dorbar namar ba u la phiel ban pyniaid. “Nga la ioh pdiang ia ka shithi na u James K Sangma kaba pynpaw ia ka jingbym shaniah shuh ia u Lamphang halor ka nongrim ba u la phiel ban pyniaid bad ngi kwah ban weng noh ia u”, la pule u Mondal ia ka jingong ka shithi ba la pdiang na u James.
“Halor kane, katkum ka kyndon pyniaid 179 (C) ka riti synshar ka ri bad ka Rule 1(35) ka Meghalaya Assembly, la pdiang ia ka NC bad ka jingiatynjuh kan long ha ka 16 tarik Nailur hadien ba la pyndep lut baroh ki kam ki jam”, la ong u Mondal.
Da ka jingpdiang u Lampphang ia kane ka NC, ka jingiakhih iaksar ban iatan briew hapdeng ka liangsynshar bad ka liangpyrshah ka la shit puk mynta. Ka liangpyrshah ka la sngewthuh shai ba ka donkam ia ka jingkyrshan jong ki dkhot ka liangsynshar ban ioh ia ka jingjop ia kane ka NC namar ba ki dang don tang 14 ngut bad ki dei ban ioh 31 ngut ban pynkhyllem ia u Lamphang.
Ka jingpyrshang ka liangpyrshah ka long ban tan briew ha katei ka sngi iatynjuh bor bad ka liangsynshar pat, na ka liang u myntri rangbah u Dr Mukul Sangma, ka la pynmih ia ka hukum da kaba bthah ba baroh ki MLA kiba don ha ka liangsynshar ki dei ban ryntih ban pynrem ia ka NC ka liangpyrshah.
Ka 16 tarik kan long ka drama ka ban kham itynnad bha, ban iohi ia ka jingialeh hapdeng ka liangpyrshah bad ka liangsynshar.
Phi don ban ong eiei?