Shillong, 16 Jylliew:
Kat kum ka kaiphod jong U Comtroller and Auditor General (CAG), la pyni, ba ka skhim iing ba duk, lane ka Indira Awaas Yojana, ka dei kaba la pyntreikam ha ka Jylla, naduh u snem 1996 bad ka jingmut jongka, ka long ban ai iing, ia kito kiba duk ba jynjar bad kiba hap ha u pud jong ka jingduk lane kiba don ha ka kyrdan below poverty line (bpl).
Ha Meghalaya, ka jingsam ia ki iing ba duk ka long T.38,500, kat kum ka jingkhein ha U Lber 2010 bad T.15,500 na ka bynta ban pynbha ia ki iing jong ki briew kiba duk, katba naduh U Iaiong 2010, la pynkiew dor noh sha ka T.48,500 ban shna iing thymmai bad nangta T.15,000 ban maramot ia ki iing kiba jot.
Na ka liang jong U CAG, ula pynlong ia ka jingtohkit ha 4 tylli ki District bad phra tylli na ki 39tylli ki Block bad 74 na ki Area Employment Coun cil bad sa 148tylli ki shnong, ha kaba la wad jingtip,ia 6ngut kiba ioh ia kitei ki skhim, na kawei kawei ka shnong.
Haba leit jurip ia ka Block Mawkynrew, Pynursla ha East Khasi hills, ka Mawshynrut bad ka Mawkyrwat ha West Khasi hills, ka Songsak bad ka Resubelpara jong ka East Garo hills bad nangta sa ka Dalu bad ka Tikrikila jong ka West Garo Hills District, la lap ba ha Mawkynrew, kiba ioh iing baduk, ki don 84ngut, ha Pynursla, ki don 78, ha Mawshynrut 120 iing, ha Mawkyrwat 114ngut, ha Songsak 108 iing, ha Resubelpara, Tikrikila bad ha Dalu mar 120 iing bad kitei ki dei ki iing kiba la tei ha ki snem 2008-09 haduh 2012-13 bad ba la leit jurip ha U Jymmang haduh U Nailar jong u snem 2013.
Katba kum ka jingbatai jong ki kyndon ka IAY, ka long ba ka iing baduk, ka dei ban iaid katba kum jing don jong ki briew kiba duk bad ba kiba la kham slem, kin ioh ia ka lad kaba nyngkong ban shna iing.
Hynrei ka kaiphod jong U CAG, ka lap ba na ki 144tylli ki shnong, kiba la jied ban ai iing baduk, naduh ki snem 2008-09 bad 2012-13, la lap ba ha ki 90tylli ki shnong, ki don 396 tylli ki iing baduk, ba la ai ia ki briew ki bym dei satia ban ioh bad ki bym dei satia kiba duk lane kiba don kyrteng ha ka thup ban ioh iing IAY bad ha katei ka jingjia, ka sorkar, ka la shu pynlut kai ia ka pisa kaba T.1.81klur sha ki briew, ki bym dei satia ban ioh iing baduk, ong ka kaiphod jong U CAG.
Kitei ki briew, ki bym bit satia ban ioh iing baduk, ki long 9ngut ha Mawshynrut Block, 16ngut ha Mawkyrwat, 59ngut ha Mawkynrew, 42ngut ha Pynursla, 54ngut ha Dalu, 118ngut ha Dalu, 66ngut ha Resubelpara bad 32ngut ha Songsak.
Phi don ban ong eiei?