Shillong,16 Jylliew:
Ka KSU Mawlai ka la pynpaw ba kan ym shaniah shuh ia ka KSU Central body hapoh ka jingialam u samla Daniel Khyriem bad u samla Augus ter Jyrwa, hynrei kin bteng ia ka KSU ha Mawlai kum ka seng ba laitluid bad lada ioh jingkyrshan na kiwei pat ki Unit ka lah ruh ban poi sha kawei ka bynta (kaba ki nongialam KSU na Mawlai kim shym la ong eiei). Haba kren sha ki nongthohkhubor mynta ka sngi ha Shillong Press Club, ki nongialam ka KSU Mawlai Circle bad kumjuh ruh ki nongialam na ki Unit bapher bapher jong ka Mawlai, ki la iathuh ba ka daw ba la pynlong ia ki ba kin ym lah ban shaniah shuh ia ka KSU Central Body halor ka jingshim jong ka ia ka rai ban beh seng ia u President jong ka Mawlai Circle u samla Donbok Kharlyngdoh bad kumjuh ruh ban weng noh ia ka Mawlai Circle .
Katkum ka jingiathuh ki nongialam ka KSU na Mawlai, ki la ong ba u President ka Circle u la shah beh seng halor ki ar tylli ki nongrim kiba ka seng kmie ki la ong ba u la pynkhein ia ki kyndon ka seng, kawei ka dei namar ba u la kren sha ki kot khubor shaphang ka ILP bad kawei pat ka dei ka jingmih jyndat jong u na ka jingialang General Executive Council jong ka seng kaba la long ha ka 15 tarik u jymmang ha Khasi National Dorbar Hall.
Katba halor ki jingkynnoh ba u la pynkhein ia ki kyndon ka seng u samla Donbok u la ong “Nga la pynkhein ia ka Modified Constitution ka KSU Central Body ba mynta, ym ia ka Original Constitution jong ka KSU” ong u samla Donbok uba la ong ba ka KSU Sengkmie kaba mynta hapoh ka jingialam u samla Daniel bad u samla Auguster Jyrwa kam long kum ka KSU Sengkmie kaba la ialam da u bah Paul Lyngdoh, bah Samuel Jyrwa, bad kiwei kiba kham ha shuwa
U samla Dany Mukhim uba dei u General Secretary ka Mawlai Mawdatbaaki unit u la iathuh ba ka Central body ka la pyntip sha ki unit ha Mawlai ba kin bteng beit ia ka jingtreikam, wat la la weng noh ia ka Circle, hynrei utei u samla u la pyrshah bad pynrem ia ka rai ka Central Body ban beh seng ia u President ka Circle. Haba kynnoh ba ka jingshah beh seng jong u President kam da dei eh na ki daw ba ka Central Body ka la pyntip, ki nongialam ka KSU na ki Unit jong ka Mawlai ki la kynnoh ba ka daw tynrai ka dei namar ka jing sospon ka Mawlai Circle uwei u dkhot jong ka u samla Wanstep Dkhar uba long ruh u nongiarap pynmih pisa (Finance) ia ka KSU Sengkmie.
Ka KSU Mawlai kam shym la phai dien noh na ka KSU, wat hadien ba ka Central Body ka la weng noh ia ka Circle, hynrei ki unit ki la pyntip ba kin bteng ia ka jingshakri kum ki sengbhalang ym da kiwei pat ki seng hynrei kin bteng beit kum ka KSU, ka ban ym hap shuh hapoh ka jingpeit jong ka Central Body hynrei kan long noh kum ka seng ba laitluid, “Ngim shaniah shuh ia ka KSU Central Body, hynrei ngin bteng ia ka KSU Mawlai kum ka Independent Body” ong u samla Mukhim.
Haba kren halor katei ka phang ban dang bteng ia ka jingshakri kum ka KSU, u samla Donbok Kharlyngdoh u la ong ba la 16 snem la ia don ha ka KSU, um sngewlah shuh ban dang ieh ia katei ka seng, wat la ki la don na ki para dkhot bad ki nongialam kiba la poi sha ka jingiakren ban thaw noh da kawei ka seng, u la ong ba ki la don ruh ki para dkhot na kiwei pat ki unit (ym na Mawlai) kiba la phone sha u ban ong ba lada ka don da kawei pat ka jingmut ba un pyntip lang, hynrei ka jingsngew jong u kam ailad ba un dang kynran dien na ka KSU namar ba u shim ba u la longdoh long snam ha ka KSU.”La 16 snem ngi la ia pyrta,’ Maitshaphrang Khlur ka Ri, Im Slem KSU’, ngam sngew nang shuh ban dang ong Im slem…..da kawei pat ka kyrteng seng” ong u samla Kharlyngdoh.
Haduh mynta na ka liang ki Unit ka KSU ha Mawlai ki la phah sha ka Central Body ba kan peit bniah biang sa shisien ia katei ka kam, halor ka jingshim rai ban beh seng ia u President ka Circle bad ruh ban weng noh ia ka Mawlai Circle, kaba haduh mynta ki Unit na Mawlai ki dang ap jubab na ka Sengkmie.
Ha katei ka jingiakynduh bad ki nongthohkhubor, u samla Donbok Kharlyngdoh u la pynshai ruh ba ka KSU ka la beh seng ia u na ka daw ba u la kren sha ki kot khubor shaphang ka ILP kaba u ong ia ki nongialam “Wat ia pein ia ka ILP bad ka sha shi pela na u Dr.Mukul Sangma, Myntri Rangbah”—-”Donkam ia ka ILP ym da kiwei pat ki ain ban iada mynder”- “Ka jingbyrngem pyniasoh HNLC ki samla ka KSU Mawlai”- “Maham ia ki Politishian ban shim ia ka ILp kum ka mat elekshon jong ki” bad kiwei ki khubor ba iadei bad ka ILP. Ha kaba ia dei pat bad ka jingmih jyndet na GEC, u samla Donbok u la ong ba ka daw ka dei namar ba ka Central Body kam burom ia ka Circle, naba u dkhot ba la shah sospon ruh u dang wan shong jingialang, u la ong ba u la ia kren bad u samla Auguster Jyrwa bad kumjuh ruh u samla Lambokstar Marngar halor katei ka phang, hynrei wat hadien ba la ia kren u samla Kharlyngdoh u la kynnoh ba ka long pynban kumba ki nongialam ka KSU Sengkmie ki pynkjeh bad khroh ia u dkhot ba la shah beh seng bad kim sngap ia ka Circle.
Phi don ban ong eiei?