Shillong,10 Naitung:
Ka sorkar jylla ka la thaw ia ki komiti bapher bapher na ka bynta ban wad ia ki lad ki lynti ban iada na ka jingwan rung kyrthep ki mynder sha kane ka jylla. Haba ia kren bad ki nongthohkhubor mynta ka sngi ha Secretariat, hadien ba la wai ka jingialang ki Myntri sorkar u Dr.Mukul Sangma, Myntri Rangbah ka jylla u la ong ba ka sorkar ka la thaw bun ki lad ki lynti kum ka jingsngewkhia, namar ka jingwan rung kyrthep ki mynder sha kane ka jylla. U la ong ba ka sorkar ka la thaw ruh katto katne tylli ki komiti ban peit bniah na ka bynta ban pyntreikam ia ki ain kiba lah ban khang lad na ka jingwan tuid kyrthep ki mynder sha kane ka jylla.
Kawei na ki komiti ba ka sorkar ka la thaw ka dei kaba la khlieh da u Director ka Infiltration, bad katei ka komiti ka dei ban lum ia ki jingtip ia ka jaka rung jaka mih ki mynder kiba wan sha kane ka jylla, u la ong ba la ai por ar bnai ia katei ka komiti ban wanrah ia kita ki jaka rung jaka mih ki bar jylla kiba rung bad kiba mih na kane ka jylla.
Kawei ka komiti ba ka sorkar ka la thaw ka dei ban peit ia ka Benami Transaction Act, ka Tenent Verification Draft Bill, kaba long ruh ka daw ba ki mynder ki ioh lad ban rung sha kane ka jylla. Ia katei ka komiti yn khlieh da u Myntri Rangbah ba-ar ka jylla u bah Rowell Lyngdoh bad u ban iarap ia u bah Rowell pat u dei u bah HDR Lyngdoh , uwei na ki myntri sorkar bad yn ia donlang ruh kiwei ki tnad sorkar kynthup ia ka tnad Ain( Law) bad kam pohing( Home). Sa kawei pat ka komiti ka ban peit ia ka jingrung be-ain ki bar jylla bad ki mynder sha kane ka jylla ka dei ka komiti ka ban khlieh da u Chief Secretary ka jylla u bah PBO Warjri.
Hadien ki jingkren jong u Myntri Rangbah ki nongthohkhubor, ki la kylli la katei ka ain ka dei kata ka ain kaba ia syriem hi kum ka ILP, namar ba ka sorkar kam lah ban pyntreikam ia ka ILP, katei ka jingkylli ka la pynkiew jingshit ia u Myntri Rangbah bad u la khluit tar ha kaba u la ong, “Kam don kano kano ka jingiakren shaphang kata ka ILP ne ka Modified ILP-ngi ia kren ia kawei pat ka ain ka lah ban pyrkhing ia ka jingwan rung kyrthep ki mynder” ong u Dr.Mukul, haba la kylli pat ia ka kyrteng ka ain u Dr.Mukul, u la ong ia ka kyrteng yn sa ia peit pat hadien bad ai ba ka kyrteng kan long kaba kumno kumno ruh hynrei ka dei pat ban long ka ain kaba pyrkhing mynder.
Lah ban kdew ba ha katei ka jingialang la ia don lang ki myntri sorkar ba kynthup ia ka kong Roshan Warjri, kong Ampareen Lyngdoh, bah Rowel Lyngdoh, bah HDR Lyngdoh bad u Prof. R C Laloo.
Phi don ban ong eiei?