Shillong, 8 Naitung:
Ka jingkyndang bar jylla ka nang jur kat nang mih ki sngi, ha kaba la iohi ba katei ka jingkyndang bar jylla ka la sdang shuwa na ka tnad khaii pateng ka KHADC, kaba la khynra Trading License ha ki iew ba hap hapoh ka jingpeit ka District Council. Ha dien katei sa ki nongshna bad nongpynmih phlim Khasi Jaintia ki la kyndang dukan die tuh ia ki phlim Khasi, bad mynta pat sa ka KSU ka la kyndang Labour License bad Work Permit na ki bar jylla.
Kumba 80 ngut tam ki bar jylla ki la shah kyndang mynta ka sngi na Mawlai, kitei ki bar jylla ki dei ki nongbylla sngi ki bym don ia ka Labour License, bad don napdeng jong ki kiba don Laisen hynrei ki dei pat kiba la dep kut por. Kitei ki bar jylla ki dei kiba trei ha ki kudam iew bad kiba bylla shna ing briew.
La pynlong ia ka jingkhynra bar jylla mynta ka sngi ha Mawlai,Mawiong, bad ia katei ka jingkhynra Labour License la pynlong da ka KSU Mawiong Unit ryngkat ka jingiatreilang bad ki unit bapher bapher jong ka Mawlai.
Ki la don haduh kumba lai saw tylli ki jaka long iew kiba ka KSU ka la leit ban kyndang ia kitei ki bar jylla, hynrei kiba kham bun eh ki nongbylla ki dei kiba la ioh bat na Marketing Board. Ka KSU ka la iathuh ba kiba bun na kitei ki nongbylla khlem laisen kim dei wat tang ki nong India paka ruh, kiba bun ki dei ki Nepali, bad kiwei pat na kiwei ki ri ba marjan , iathuh u nongialam ka KSU na Mawiong Unit.
Kitei ki bar jylla ba la shah kyndang mynta kiba bun na ki ki la leit phai noh sha la ki jong ki shnong. Ha ka jingshisha ka la don ka jingiasngewthuh bakla khyndiat hapdeng ki nongialam ka KSU bad u Rangbah Sshnong ka Mawiong, namarba kim pyntip shuwa ban pynylong ia katei ka jingkhynra, khnang ba yn lah ban ia treilang bad ka shnong, hynrei kitei ki jingbym ia sngewthuh jingmut la lah ban ia pynbeit noh tang hadien katto katne por.
Na ka liang ka KSU ka la maham jur ia baroh ki bar jylla kiba wan ban bylla sha kane ka jylla ba ki dei ban pynbiang ia ki Labour License bad ki Work Permit, bad ka seng ka la maham jur khamtam eh ia kito ki kontraktor ki ba ju khot bylla ia ki bar jylla ba kim dei ban ai bylla lada dei ki briew ki bym pat ioh laisen ne ki Work Permit.
Phi don ban ong eiei?