Shillong, 8 Naitung:
Ka Shrishty (ba la kylla kyrteng) kaba dei ka lok jong uwei u shipai ka Assam Rifles ka kynnoh ba ki heh ha kane ka tnad shipai ki la pynbor ia ka ban buhrieh pynban ia ka jingjia hadien ba ka leit ban ujor ia kane ha ki heh shipai.
Haba kren mynta ka sngi sha ki nongthoh khubor, ka Shrishty ka la kynnoh ba u Dan Singh Negi, u shipai na ka 40 Assam Rifles u la kren kynshlein ia ka la saw bnai shaphang ka shongkha shongman bad hadien ba ka la leit ban ujor sha kiba heh katei ka tnad shipai, la ai jingmut pynban ia ka ba kan sngap noh ban nym pynmih pyrthei ia kane ka jingjia.
“Ki ophisar ki la ai jingmut ia nga ban nym iaid shakhmat ia kane ka kam namar ba kan ktah ia nga bad ka iing ka sem jong nga”, la ong ka Shrishty ha ki nongthoh khubor bad ka la bynrap ba ka jingkylli ba ki ophisar ki la kylli ia ka haba ka iathuh ia kane ka jingjia, ka long, “phi la iathiah bad u?”
Ka la ong ba wat shwa ban sngap ia ka jingjia baroh, u ophisar u la kylli ia ka da ka rukom kaba shah shiliang bad ka pyni ia ka jingbym khein snep jongki ia ki kynthei.
Mynta ka la dawa ban pynlong ia ka jingtohkit pyrshah ia u Negi khnang ban sei madan ia ka jingshisha.
Ha kawei ka liang, u nongaiktien ka Assam Rifles u Lt. Col Sunil Rawat u la ong ba katei ka longkmie kam shym la ujor ejahar ha ka tnad shipai haduh mynta.
“Ngi la kyrpad ia ka ban leh ia kane bad hadien, yn sa leh da ka jingtohkit bad lada don mano mano baleh tam, yn pynshitom da kaba tyngeh” u la ong.
Ha kajuh ka por, ka sur ba la rekod lyngba ka jingiakren da ka phun, ka pynpaw ba u Negi ula kam ba u la sah bad ka ha Iingbasa bad u la don kiwei ki sakhi ba u iakhun bad kane ka kynthei na ka bynta ki kam brai.
“Kane ka pyni ba u Negi ba u la byrngem ba lada nga shah ia u un nym pynjah burom ia nga bad ka iing ka sem”, ka la ong.
Haba iakren bad u Negi u la kam ba u long uba shida bad um shym la leh kano kano ka jingpyndik ia ki kynthei ne ia katei ka longkmie.
“Kam long kaba shisha, ngam ju leh kano kano kaba bakla. Ngam ju ong kito ki kyntien kiba la kynnoh pyrshah ia nga” u la ong u Negi.
Ha kawei ka liang, ka North East Regional Domestic Workers Movement (NERDWM) ka la thoh ka jingujor sha u Commandant ka 40 AR pyrshah ia u Negi.
Phi don ban ong eiei?