Nongpoh, 8 Naitung :
Ka Khasi Students’ Union (KSU) jong ka North Khasi Hills district unit hynne ka sngi ka la hiar kynsan sha Khana para ban leit pynpra ia ki ar tylli ki sign board ba la sieh be-aiñ da ka Assam kaba kawei ka don ha Jorobat bad kawei pat ha ka shnong Mawsmai, kiba la pynieng harud ka surok bah.
Ia katei ka jingpyn pra la ialam da u Samla Vincent Makri, general secretary ka KSU NKHD bad u Bah Paul Wahlang, vice president ka KSI, Northern Border Area bad kiwei ki dkhot nongialam ka seng. U Samla Vincent haba kren hakhmat ki nongthoh khubor, u la ong ba ka jingpynpra jong ka KSU ia kitei ki sign board ka dei halor ka nongrim ba ia kitei ki sign board la sieh ha ki jaka jong ka Meghalaya, katba la thoh pat ha baroh ar tylli da ki kyntien ‘Welcome to Guwahati’ kaba kum ka seng ka la iohi jngai ba lada ailad ia kitei ki sign board ba kin ieng bad pdiang sngewbha ia ki briew sha sor Guwahati, ha kawei pat ka por na kitei ki ar tylli ki jingthoh ka Assam kan sa kam pat ba ki hap hapoh ka jylla Assam, kaba yn ym don ba lah ban pynkhih pat.
U la bynrap ruh ba ka jingkwah ka seng ka long ba ki jaka kiba hap hapoh ka jylla Meghalaya kim dei ban duh wat tang shi inshi ruh bad ban shah kam ha kiwei pat ki jylla kiba ju klun jaka beit man la ka por bad kum ka seng kam kwah ruh ba ka khyndew ka shyiap jong ki paid ka bri u Khasi Hynñiewtrep kan long noh jong kawei pat ka jylla, hynrei kan neh kan sah beit bad la ka jong ka jylla bad ka seng kam banse ban ieng rangbah ban iakhun dohiap bad wat ban ialeh haduh ban da umsnam ruh ka seng kam banse ban ieng ban iada ia la ka jaidbynriew na ka jingshah thombor kaba na ka por sha ka por.
U la pynrem ruh ia ka jingbym patiaw ka sorkar jylla bad ki bor ka KHADC, kiba shu nap tang ka kawang ktieh ha Ïingdorbar, katba ban hiar madan ban wad ia kine ki jingshisha kiba ki paidbah ha kitei ki jaka khappud ki ju mad na ka por sha ka por ha ki kam shah thombor ia ki jaka puta ba dei hok jong ka jylla.
Kitei ki ar tylli ki sign board ki dei ba la pynieng da ka Punjab National Bank, Assam ha Jorobat bad kawei pat kaba la pynieng da ka Kompani kaba ym paw shuh ka kyrteng ha Mawsmai.
Phi don ban ong eiei?