Shillong, 7 Naitung:
Ka kynhun ki heh ka tnad sor bad ki majistrate na Nongpoh kin leit ban jurip ia ka Khanapara ha kane ka sngi Hatmajai ban wan halor ka jingkynnoh wan skud jaka ka Assam da kaba pynieng da ka Iingbasa ne Five Star Hotel kaba don hajan ka Guwahati ha khappud ka Meghalaya bad ka Assam.
U Acting Deputy Commissioner ka Ri Bhoi Bah KL Nongbri ha kane ka sngi Nyngkong u la ong ba kin hiar lashai sha katei ka jaka ban wad ia ka jingshisha.
Ka Iingbasa ka don tang shi pda maw na ” Koinadhora” kaba dei ka jaka sah u Myntri Rangbah ka Assam. La don ka jing kam ba katei ka jaka ka dei jong ka Meghalaya, hynrei la ai sngewbha noh sha ka Assam ban shna ia ka Iingsah jahthait kaba khot ka Indira Bhavan ha ki snem 1970.
Ha kane ka sngi Saitjain, ki dkhot ka Ri- Bhoi Youth Federation (RBYF), hadien ba la ioh ia ka jingujor na ki khlieh nongsynshar katei ka thain, ki la leit ban jurip ia ka jaka ba shna ia katei ka Iingbasa ha Them Marwet, Khanapara bad ki la pynsangeh shi syndon ia ka jingshna ia katei ka Iingbasa ba la dei trai lang u Ram Avtar Agarwal bad u Suresh Prithani.
Hynrei, ym shym la ujor FIR eiei da ki trai katei ka Iingbasa halor kane ka jingjia.
U Bah Nongbri u la ong ba katkum ka rekod, katei ka jaka ka dei jong ka Meghalaya hynrei yn pynshisha ha ka jingjurip lashai ka sngi.
Katkum ka jingong u khlieh nongsynshar, ka Raid Marwet u Bah K Syiem bad ki Rangbah shnong ka Khanapara Bah Jeromi Lyngdoh, u Agarwal uba dei na Assam u la kam ia ka jinglong trai ia katei ka jaka ba la thied na ka Saikordor Rumnong.
Kitei ki khlieh nongsynshar ki la kynnoh ba ka jaka ka dei jong ka Meghalaya bad ka Rumnong kam shym la shim permishon na ki nongpyniaid shnong haba die ia katei ka jaka.
Phi don ban ong eiei?