Shillong, 13 Jylliew:
Ka Myntri kam poh iing ka jylla ka Kong Roshan Warjri ka la iathuh mynta ka sngi, hapoh ka iing dorbar ba ka sorkar jylla ka la buh ia ka Subsidiary Multi Agency Centre (SMAC) ban pyn khlain ia ka tnad syntiat khamtam ha kaba iadei bad ka jingiakhun bad ki kynhun pyntriem.
“Ia ka SMAC la buh ha ka nongbah bad ia ki jingtip la sam thikna ha pdeng ki dkhot jong kane ka kynhun. Kane ka SMAC ka pynlong ia ki jingialang man ka por hapoh ka jingkyrshan ka Subsidiary Intelligence Bureau,”, la ong ka Kong Warjri haba jubab ia ka jingkylli ba la wanrah da u MLAka NPP u James K Sangma hapoh ka iing dorbar hynne ka sngi Thohdieng.
Ka la ong ba ka SMAC Control Room la pynbiang ia ki tiar kaba treikam ha Special Branch headquarter.
Ka myntri ka la ong ruh ba ka sorkar ka la thaw ia ka State Level Standing Committee ban tei ia ka jingiadei hapdeng ki pulit, ki bor BSF, CRPF bad u Chief Secretary u dei u chairman.
Ha kajuh ka por, ka iathuh ba ka sorkar pdeng ka la ai alai, bad kiwei ki tiar ban pynkhlain ia ka tnad pulit.
Ka la iathuh ba ka sorkar jylla naduh u snem 2006-2007 haduh u snem 2011-2012 ka hap ha ka kyrdan ‘A’ ha kaba ka ioh ia ka jingiarap 100 percent na ka sorkar pdeng. Hynrei ha u snem 2012-2013, la pynjynsur sha ka jingiarap kaba long 90 percent na ka sorkar pdeng bad 10 percent na ka sorkar jylla.
Shwa ia kane haba wanrah ia ka cut motion, u MLA ka NPP u James K Sangma u la buh jingkylli ia ka jingpyntreikam ia ka jingpynkhlain ia ka tnad pulit.
“La iathuh ia nga ba ka pisa khlem pyndonkam na ka bynta ban pynkhlain ia ka tnad pulit”, la ong u Sangma.
U la buh jingkylli ruh ia ka rukom iakhun lehnoh ka sorkar. Ha kawei ka liang, u la iathuh ba ka jingwan ki kompeni CRPF na ka sorkar pdeng dei namar ka jingshim khia u MP ka Tura u Purno A Sangma.
Phi don ban ong eiei?