Hadien ka jing pynbna jong ka tnat pulit ia ki hajar tylli ki kam, ha ki khyndiat sngi ba ladep, ka la mih, ka jingiakren jong kiba bun ki nong kwah kam, halor ka bai phom, ban aplai ia kitei ki kam bad kumjuh sa ki jingbatai, kiba ki kwah ban tip bha, ia ki kyndon ban ialeh ia ki eksamin bapher.
Kawei kaba ki riew paidbah, kiba la iakren bad U Rupang, ki ujor, ba ia kat katei ka jingpynbna, kaba dei na bynta ki hajar ngut ban rung kam pulit, ym shym la pynbna iar ha ki kotkhubor, kiba poi lut sha ki kyndong kynshrot jong ka Ri Khasi Jaintia; hynrei, la shu pynbna jied tang ha iwei, ar tylli ki kotkhubor bad katei ka long kum ka jingkhanglad ia ki samla wad kam, ba kin shim ia katei ka lad iakhun kam pulit.
Uwei u heh pulit, haba iakren bad u nongthoh, u ong “Ngi mynshwa, ha ka por, ba ngi dang don ha ki thanat bapher, ngi ju rah da ka tynghung bad pynbna iar ha ki iew ki hat, ba ki samla kiba kwah kam pulit, kin shim ia katei ka lad ban tyrwa ialade”. Utei u heh pulit, u kren lyngngoh ruh, ba kumno ha kine ki sngi, ym shym la pynbna iar ha ki kotkhubor, khamtam ha ki kotkhubor Khasi.
Dangshen, ki pulit jong ka Jylla, ki la pynmih khubor, ba ki don bun ki samla sha Garo hills, ki bym tip satia, ia ka jingpynbna thung kam pulit bad katei ka la pynlong ia ki, ba kin leit pynlong ia ki jingialang ba kyrpang, ban khot ia ki samla, ba kin pynrung kam pulit.
La don ruh ka jingkhnium jong ki samla, ia ka jingrem jong ka bai phom, kaba shongdor haduh T.100, kawei ka phom, haba ka jingthmu, kam dei ba ka tnat pulit, kan kamai pisa na ka bai phom, hynrei, ka long ban iarap ai kam ia ki samla kiba kwah rung kam pulit.
Phi don ban ong eiei?