Shillong, 12 Jylliew:
Ka KSU HEHU Unit ka la pynkupburom ia ka samla Ruth Z West Kharkongor kaba dei ka samla Khasi kaba nyngkong eh ban ioh laisen kum ka nongniah liengsuiñ ne ka Pilot bad ka la pynkupburom ruh ia ka samla Dukini Kyndiah kaba dei tang ma ka marwei na kane ka jylla ban pass ia ka eksamin ka UPSC ha u snem 2015. Ka KSU ka la pynkupburom bad ai khusnam ia ki samla pule ba la pass ha ki kyrdan bapher bapherkiba don 14 ngut kiba la tip kum ki gold medallists na ka Skul Bah NEHU. Ia katei ka khusnam la tip kum ka B.Pakem Academic Excellence Award,2016′.
Katei ka jingialang ka la long ha ka 10 tarik mynta u bnai hapoh Community Center, NEHU, Shillong Campus. Ha katei ka sngi ka la don ruh ki prokram bapher bapher ba ka KSU NEHU ka la pynlong kum ka jingiathir nia ne ka Panel Discussion halor ka phang, “Challenges Confronting the Students of Meghalaya in the context of Competitive Examinations” bad lapynkut pat ia ka prokram da kaba pyni ia ka phlim Khasi kaba kyrteng ‘U Syiem’. Ia ka jingthir nia la pyniaid da u Prof.Desmond Kharmawphlang bad la ia shim bynta ha ka jingiathir jingmut da i Dr.Natalie West Kharkongor,Associate Prof.Economics bad Head,CEDNER, IIM,Shillong,i Dr.K.G.Lynrah,Head of the Department of General Medicine,NEIGRIHMS, i Dr.C.Myrthong,Head of Civil Engineering Department,NIT,Shillong bad u Bah Toki Blah,u IAS ophisar ba la shongthait.
Ka panel discussion ka la wanrah shibun ki symboh pyrkhat kiba la pynkhih ia ka pyrkhat pyrdain ki nongwan shimbynta.I Dr.Natalie i la ban jur ia ka jingdonkam ban pyniar ia ka jingtip kyllum ryngkat ka jingdonkam ki coaching class lada kwah ban ruh ha ki Management courses. I Dr.Lynrah i la pynpaw ia ka jingdonkam ban trei minot tista naduh ki class ba dang rit haduh higher secondary level ryngkat ka jingshimkhia ban wad ia ki jingtip ba donkam ha ka por ba dei.I Dr.Myrthong i ban jur ia ki khynnah engineering ban bteng ban pule ha ki kyrdan ba ha jrong.U Bah Toki u sngew ba ka jingbymdon ki coaching centre ba bha kiba la bei tyngka da ka sorkar ka long kawei na ki diengpynkiang ba Khraw tam kiba khanglad ia ki khynnah pule Khasi,khamtam ia ki khynnah ba wan na ki longing ba duk,ban jop ha ki exams UPSC.
Ka jingmih na kane ka panel discussion ka long ka jingai jingmut na baroh ki nongkren,ba ka jingdonkam kyrkieh jong ka por ka long ban seng noh ia ka Coaching Center ka ban ai jinghikai kyrpang lyngba ki resource person kiba tbit na ki lain ba pher ba pher ban ai ka jinghikai ia ki khynnah ka jylla ban pynkhreh ia lade ha ka rukom ba bha tam na ka bynta ki competive exams ba bun jaid-UPSC,CLAT,CAT, JEE, Advanced JEE bad kumta ter ter.Ki panelist ki kdew ruh ba ka Skul Bah NEHU ka dei ka jaka ba biang tam ban pyniaid ia kaba kum kane ka Coaching Center. Ha ka jingialang pynkupburom ia ki samla kaba la sdang ha ka por 1 baje mynsngi la don ryngkat U Bah P.N.Syiem,CEM ka KHADC kum u Kongsan, i Samla Auguster Jyrwa,General Secretary ka KSU, Sengkmie kum u Symbud Kongsan bad i Samla Donald.V.Thabah,Education Secretary ka KSU,Sengkmie.
Phi don ban ong eiei?