Jowai, 13 Nailur:
Ka Dorbar Shnong ka Shnong Myngsngat ka la kynthoh tyngeh ia ka JHADC hapoh ka jingia-lam U Ma Thombor Shi-wat, CEM, namar ba ka la pyndonkam bakla ia la ka bor bad pynkhein ia ka Ain ba iadei bad ki Waheh Shnong katkum ka “The Jaintia Hills Autonomous District (Establishment of Elaka and Village and Election, Appointment, Powers, Function and Jurisdiction of Dolloi/Sirdar and Waheh Shnong) Act 2015” ba la ioh ka jing-mynjur na u Lat ka jylla ha ka 23tarik Nohprah 2015. Kane ka jingpyndonkam bakla jong ka JHADC ia ka bor jongka, ka dei ka jingbym ai sanad ia u Waheh Shnong jongka Shnong Mynsngat hadien bala dep ban jied ia u ha ka 20tarik Iaiong, da kaba ia thep vote, ba la pyniaid da u nongmihkhmat jong u Dolloi ka Elaka Nartiang, kaba la long katkum ka section 23 (3) jong katei ka ain ba la kdew haneng. Ha kane ka jingiathep vote la don (6) hynriew ngut kiba ia khun ia ka kam Waheh shnong bad ia ka jingjop la ioh da u Phresmi Suting.
Ha ka juh ka sngi hadien ba la dep jied waheh shnong bad ladep ban pynbna paidbah ia u nongjop, u pyrman jong u Dolloi u la tyrwa ia ka samoi treikam jong u Waheh shnong sha ki paidbah, kata katno snem ban long waheh shnong bad ki paidbah baroh ki la jubab da ka jingmynjur lang na ka bynta (3) lai snem khlem ka jingpyrshah na uno uno ne kano kano ka briew. Kumta u Dolloi u la ai ia ka jing pynthikna, na ka bynta lai snem katkum ka section 26 jong ka ain ba la kdew haneng.
Ha ka Dorbar paidbah (Dorbar Shnong) kaba la long ha ka 26tarik Iaiong 2016, la jied ia ki nong kitkam shnong (Executive Body) katkum ka Section 22 jong ka ain ka JHADC bad la pynskhem ia ka samoi treikam jongki na ka bynta (3) lai snem, khlem kano kano ka jingpyrshah na kano kano ka liang ne ki riew shimet.
Hynrei ha ka 23tarik Jymmang 2016, ki khatwei ngut ki briew ba la kam ialade kum ki Chairman bad secretary dong ki la phah shithi sha ka Administrative Officer (AO) JHADC, bad ha kane ka shithi ki la kyrpad ia ka Administrative Officer ban pynioh sanad ia u Waheh shnong thymmai, U Phresmi Suting, tang shisnem. Kine ki briew ki la phah shithi khlem ka jingialang paidbah ha ki dong ba ki don bad ym tang katta hynrei ki la pyndonkam bakla ruh wat ia ki muhor jongki dong khlem ka jingmonjur/jingtip lang ki paidbah. Na ka liang ka AO ka la shim ba kane ka shithi ka bym don nongrim eiei ruh em kaba ka la ioh pdiang, kum ka jingujor bad hadien kane ka AO, ka la khot ia baroh arliang bad kumjuh ia u Dolloi Nartiang ha ka 10tarik Nailar 2016. Ha kane ka sngi na ka liang u pyrman jong u Dolloi u la kren shai ba ka samoi trei kam jong u waheh shnong ka shnong Mynsngat na ka bynta (3) lai snem la ai katkum ka jingmynjur jong ki paidbah jong ka shnong bad ym lah ban pynduna ne tam ia kane.
Na ka liang ka Executive Body jong ka shnong Mynsngat ka la shim ba kane ka jing bym ai sanad ia u waheh shnong naduh kine ki sngi, ka don kaei re kaei ka jingmut ba sniew sha lyndet. Kumta na ka liang ka Dorbar Shnong haka 12 tarik mynta u bnai ka la ia kynduh biang bad ai da ka jingthoh ban dawa jur na ka JHADC ba kadei beit ban ai sanad ia u waheh shnong U Phresmi Suting ia uba la dep ban jied bad pynjop donburom da ki paidbah da kaba iathep vote, kaba long katkum ka riti synshar jong ka Ri India lane katkum ba la bthah da ka ain jong ka JHADC. Lyngba ka jingthoh la dawa jur na ka JHADC ban pynioh sanad hapoh 26 Nailur 2016, lym kumta ka shnong baroh kawei kan iaid da ka jingiakhih paidbah lane wat ban kiew iinglieh iingsaw, khnang ban ioh ia la ka hok.
Phi don ban ong eiei?