Shillong,14 Iaiong:
Ka Synjuk ki Seng Samla Shnong mynta ka sngi ki la leit ban ia kynduh ia u Chief Executive Member ka KHADC u bah Pyn shngaiñ N Syiem bad ha katei ka jingiakynduh ki la ai ruh da ka jingthoh ba ka KHADC ka dei ban pyntreikam noh ia ka rukom thungkam thung jam hapoh District Council katkum ki kyndon jong ka Recruitment Policy.
Haba kren sha ki nongthohkhubor hadien katei ka jingiakynduh ia u CEM u General Secretary katei ka seng u bah Ricky Pathaw u la ong ba ka jingdawa ka Synjuk ki Seng Samla ka dei hadien ba ki la lap ba ka don ka jingleh thur mur kaba jur bha hapoh KHADC ha kaba ia dei bad ka thungkam thungjam, u la ong ba katei ka seng kan ai por bnai ban pyntreikam noh ia katei ka kyndon thungkam bad katei ka saw bnai kan kut ha u naitung mynta u snem bad u la byrngem ba lada jia ba ka District Council kam pyntreikam noh khlem pep kin leit ban ujor sha ka ing bishar.
U samla Ricky Pathaw ula ong ba na ka liang u CEM, ula pynpaw ba un sdang shwa noh ia ka Administrative Reform Committee bad yn pynrung lang ia kane ka Recruitment Policy bad ka Council kan pan ruh ia ka jingiarap na ka Indian Institute of Management halor kane ka bynta khnang ba baroh ki samla kin ioh iaka lad ban iakhun ia ki kam kiba lait hapoh ka Council bad ba ki MDC kim dei shuh ban shu thung da ki briew kiba ki sngewtynnad ne sngewjan.
Ha kaba iadei bad katei ka mat ba ki Seng Samla ki wan ia kynduh u bah Pynshngaiñ u la ong ba ha kine ki sngi ba la de ka District Council kam pat ioh por ban ia kren ia kata ka thungkam thungjam namarba ka dang bunkam palat ban pyrkhat ia kiwei pat ki ishu kiba ktah ia ka jaitbynriew kumka jingkyntur pud ka MUDA bad kiwei. “Nga la ong ia ki ba ha kine ki khyndiat sngi ngi dang bunkam ban ia kren ia kiwei pat ki ishu ,ngin sa shong ban ia kren ia katei ka mat ba ki dawa ruh” ong u bah Pynshngaiñ haba ia kren bad ki nongthohkhubor.
Phi don ban ong eiei?