Shillong,13 Naitung:
Ka seng BJP ha ka ne ka jylla ka la kynthoh halor ki jingmih khubor ha kine ki sngi kiba u MP ka Shillong u bah Vincent Pala, u la kren ha ki lad khubor kaba ong ba un ieng pyrshang ia kino kino ki jingkhanglad na ka sor kar pdeng ban khang ia ka jingot doh masi. Halor katei ka bynta na ka liang ka BJP ka la kynnoh ba kitei ki jingkren u bah Pala ki dei tang ki jingthmu ban ialam bakla ia ki paidbah.
Ha ka kyrwoh ba la pyllait paidbah mynta ka sngi, ka BJP ka la ong ba kitei ki jingkren u MP ki dei tang ki jingthmu ban ialam bakla ia ki paidbah ka jylla, ha kaba ka la ong ba na ka liang ka sorkar BJP kam shym la don kano kano ka jingiakren ban khang lad ia ki jingot bad die doh masi ha ka jylla.
Ka BJP ka la ong ba ha ka jingshisha u MP, u la dei ban ai jingiaroh ia ka sorkar u Modi kaba la shimkhia bad mang tyngka kyrpang na ka bynta ka thain shatei Lam Mihngi, bad kaba la mang hadudh T.53,706 klur tyngka na byngta ka lynti rel, ka lynti suin bad ki surok , bad ia katei ka kam ruh ka la leh tang hynriew taiew hadien ba ka la song vha ka shuki, ka la kynthoh ba u MP u dei ban kiar na kiba kum kitei ki jingkren.
Ka BJP ka la kynnoh ruh ba kitei ki jingkren u bah Pala ki dei ki jingkren tad-dor tang da ka jingsngew briew, ka la kyntu ia u bah Pala ba ai ka jingiatreilang bad ka sorkar na bynta ka roi ka par ka jylla, kaba ka la ong ba ka dei ka kam kaba um shym la lah ban leh ha ki san snem ba la dep.
Phi don ban ong eiei?