Shillong,13 Naitung:
Ka State Co-Ordination Committee of coal Owners, Miners & Dealers Forum, ka la phah shithi sha u Modi, ban kyntu ban iarap lem ban ia kren halor ka jingshah khang tih dewiong ha kane ka jylla kaba la ktah haduh katta katta ia ki paidbah nongshong shnong kane ka jylla.
Katei ka seng ka la leit ruh ban ia kynduh ia lain gut ki MP nba kane ka jylla ba kynthup ia u Ma Vincent Pala, MP ka Shillong, u Purno A Sangma u MP na Tura bad ka kong Wansuk Syiem, ka MP Rajya Sabha ba kin buddien bad ban shim khia ban ia kren halor katei ka kam.
Ha ka jingthoh kaba la soi da u Sonny L Khyriem, u Chairman katei ka Forum u la iathuh ha u Modi ba ka jingtih dewiong ka dei ka jingtrei ba ki paidbah ka jylla ki ioh kamai bad im ja kpoh, u la pyntip ruh ba ka jingkhang tih dewiong ka lah ban ktah wat ia baroh lai tylli ki District Council kiba don ha ka jylla naba kitei ki ADc ki ju ioh lum bun tam eh ki khajna na u dewiong. Ki la ong ba ka jingkhang tih dewiong ka lah ruh ban pynduh pyndam noh wat ia ki ADC, kiba peit ia ka riti ka dustur bad ka khyndew ka shyiap ha kane ka jylla kaba hap hapoh ka Schedule Area.
Katei ka seng ka la pyntip ruh sha u Modi ba ka jingkynnoh ka Dima Sa Student Union ba ka jingtih dewiong ka pynjakhlia ia ki um ki wah, ka dei kaba bakla namarba ym pat ju don ki tyllong um bad ki wah ba la jakhlia na ka tih dewiong haduh kine ki sngi.
Lah ban pynkynmaw ba ki la don bun ki seng kiba la phah jingthoh sha u Modi ba kynthup ia ka seng ki nongniah trok bad trai trok, ka seng ki nongkhaii dewiong bapher bapher na kylleng ka jylla bad kiwei pat ki seng .
Phi don ban ong eiei?