Nongstoin,12 Jylliew: Myn ha ka sngi saitjain jong ka taiew ba la lah kawei na ki dukan die dawai hapoh sor Nongstoin, ka la lap ia uwei u briew u ba la pyrshang ban thied ia ki dawai ba kynja drok ha ryngkat ka slip dawai bad na ka liang jong ki nongdie dawai katei ka dukan haba peit thuh ia ka rukom leh jong u la ithuh shai ba u dei uba ju mlien ban dih ia kum kitei ki dawai pyn buaid.
Kat kum ka jingiathuh kitei ki trai dukan la ong ba u tei u briew u dei u ba ju mlien ban dih ia kitei ki jait dawai bad la ong ruh ba u la wanrah ruh ia ka slip dawai napoh Robert Hospital, ha kaba la thoh ruh ia ki dawai pyn iohthiah kumjuh bad ar tylli kiwei pat ki dawai, kiba ha ka pyrthei hi ym don doctor u ban thoh haduh 3 bilor ia u dawai Bronolac kumjuh bad ki dawai pyn iohthiah uba la tip kum u Diazetam.
Shuh shuh la ong ruh ba ka jing thmu jong utei u briew ban thoh lang ia kiwei pat ki jait dawai ka long tang ba kin nym tharai sniew khnang ban ioh ia kitei ki dawai, hynrei ki nongdie dawai jong katei ka pharmacy hapoh Nongstoin ki la dep tip lypa tang mar ia iohi ia katei ka slip dawai bad ki la pyrshang ruh ban bat ia u, hynrei u la iohlad ban phet krad noh.
Kum ban shu pynkynmaw ba hadien ka jingioh kem jong ki Pulit ka Nongstoin PS ia ki nong die ia ki dawai pyn buaid kiba don ia u Codein phosphate hapoh ka sor Nongstoin dang shen.
Na ka liang jong ki bor pyniaid jong ka tnad ka koit ka khiah ruh ki la ialeh ban teh lakam bad la mana jur ia baroh ki dukan die dawai ba kim dei ban die klumar kum ia kitei ki jait dawai khlem da ioh jing bit na ki doctor.
Kum kitei ki kam thok ki lah ban jia ha kiwei kiwei ki dukan dawai lada kim ithuh namar ka long kaba eh shisha ha kaba ki wan ban thied ia kum kitei ki dawai pyn buaid da ka slip jong ki hospital bad ka jing kylli ka mih ba nang no utei u briew u ioh ia ka slip original na katei ka hospital, namar la suba sniew ba ia kitei ki dawai ym shym la thoh da u Doctor hynrei la shu pyndap hi da utei u briew.
Phi don ban ong eiei?