Nongpoh, 12 Jylliew: Hato dei ka jingleh meinah ka sorkar Meghalaya kaba pynlong pat ia ka Assam ba kan nangkyntur ia u pud u sam katba nagmih ki sngi khamtam ha ki thain khappud bad ia kane la sakhi hadien ba ka Dorbar Shnong lem bad ki paidbah nongshong shnong Madan Umwang, Block II, Ri Bhoi District, ki hap ban pynlut hi ha kaban shna ia ka skul bad siew ia ka tulop jong ki Nonghikai, tang namar bym don wat tang kawei ruh ka skul kaba la ithuh da ka sorkar mynta la kumba 30 snem.
Katei ka skul kaba la tei da ka Dorbar Shnong, lyngba ka jingiarap jong ki kmie ki kpa ha katei ka shnong la tip kum ka Madan Umwang UP School, kaba don haduh kumba 60 ngut ei ei ki khynnah skul naduh Nursery haduh klas VII, katba ia kitei baroh 60 ngut ki khynnah skul la hikai tang da ki lai ngut ki nonghikai.
Kum ban shu ong hangne, ka shnong Madan Umwang, Block II, ka dei kawei na ki shnong kaba ju mih bun ki jingiakaja hapdeng jong ka sorkar Meghalaya bad Assam, ha ka liang jong u pud u sam, hynrei kane ka jingieh meinah da ka sorkar Meghalaya khamtam ha ki lad pynroi, shano kan ialam ia ki paid nongshong shnong ha katei ka thain.
Ha ka jingialang kaba la long ha ka sngi Thohdieng ba la dep hapdeng jong ki kmie ki kpa jong ki khynnah skul lem bad u rangbah shnong ka Madan Umwang, ki la pynpaw ia ka jingsngewkhia kaba jur halor kane ka jingshah iehbein ha ka sorkar jylla.
Haba ioh ban iakren bad ki nongshong shnong, ki la ong ba ka jingbun jong ki khynnah skul kiba pep skul tang shiteng por ha katei ka thain ka dei na ka jingbym don jong ki skul kiba biang, namar katei ka skul kaba don ha katei ka shnong ka don tang haduh ka klass VII bad bun na ki khynnah hadien ba ki la lait na katei ka skul, kim ioh shuh ban bteng biang ia ka jingpule, namar ban ioh leit sha ki skul ba kham biang ki hap ban iaid ia ka jingjngai kaba 30 KM, kata shaduh Mawlasnai bad Bhoirymbong.
Katba na ka liang ka Kong D. Mawlong, kaba dei ka Headmistress jong katei ka skul, ka la pypaw ia ki jingeh haba iadei bad ka jingduna jong ki nonghikai, ka la ong ruh ba kam dei kaba suk ban hikai tang da ki lai ngut ia ki khynnah kiba la palat ia ka 60 ngut, kata naduh klass Nusery haduh klass VII.
“Lada ka sorkar ka don shisha ia kata ka jingthmu ban kyntiew ia ka jingnang jingstad hapoh ka jylla, ka la dei kan phai khmat lem sha katei ka shnong na ka bynta ban kyntiew ia ka jingnang jingstad ia ki khynnah, kumta nga da kyrpad eh ia ka sorkar khamtam ia ka tnat kaba peit ha ka liang ka pule puthi, ba kin ialeh shitom na ka bynta ban pynioh noh ia ka skul kaba biang ha katei ka shnong kaba don ha khappud bad ka Assam” ong ka Kong D. Mawlong.
Na ka liang u Bah Blikshon Mukhim, Rangbah shnong ka Madan Umwang, u la pypaw da kaba ong ba ka shnong ka shem jingeh bad iakynduh ia shibun ki jingjynjar ban pyniaid ia katei ka skul, khlem kano kano ka jingiarap na ka liang ka sorkar.
U la ong ruh ba ki la dep ban phah ia ki kat ki sla sha ka tnat pule puthi ka Ri Bhoi District, na ka bynta ban kyntiew noh ia katei ka skul sha ka SSA, khnang ba ki khynnah kiba don ha katei ka shnong kin ioh jingmyntoi, hynrei kane ka jingkyrpad ka jongngi kam shem la poi shano shano ruh bad ym la don kiba shimkhia ban kyntiew lem ia katei ka skul, u la bynrap.
Namarkata, na ka bynta ka lawei jong ki khynnah ha kane ka thain, u la kyrpad ia ka sorkar jylla bad ia ka tnat kaba peit ia ka pule puthi ba kin shimkhia ban phaikhmat lem sha ki nongkyndong ruh, ym ban shu kyntiew tang ha ki jaka ba la long sor lypa, bynrap u Bah Blikshon Mukhim.
Phi don ban ong eiei?