Kan lah ban long, tang ha ki khyndiat kynta, ba ka Israel, kan hiar thma pyr shah ia ka Gaza, ong U President jong ka Palestine, U Mahmoud Ab bas.
U Chairman jong ka Palestine Liberation Organization, u maham ba ka sorkar Israel, ka la dep mynjur, na ka bynta ban hiar thma beit ha ryngkew jong ka Gaza bad ba ka jinghiar thma kan lah ban sdang noh mynta ka sngi hi. Ka jingkren jong U Abbas, ka long, hadien ba ki don bun ki jinghiar thma kiba la siat da ki nam ding, na ki bynta jong ka Lebanon, ba la siat shatei jong ka Israel. Ka dei ha ka sien, kaba nyngkong ba ki ehrang na Lebanon, ki la siat nam ding, sha ki bynta ba shatei jong ka Israel, hadien ba ka la don ka jinghiar thma, kaba saw sngi kynthih, da ki ehrang na Gaza bad ym lah ban tip, la katei ka jinghiar thma, ka dei kaba don bynta da ki ehrang Hamas lane dei ba la leh hi, da ki ehrang Hezbollah, kiba don ha Lebanon.
U Abbas, u ong ba ka Israel, ka kwah ba kin mih noh, na kitei ki jaka jongki, hynrei, u ong “Ngin nym mih satia nangne, hynrei, ngin ialeh pyrshah ha ka rukom kaba shai, wat lada ngim don tiar thma satia ban ia khun”.
Ka jingialeh ha kine ki saw sngi ba ladep, ka la iai bteng khlem sangeh bad ki shipai ka Israel, ki la ther tyngeh ia ki bynta jong ka Gaza, ha kaba 100ngut ki briew, ki la iap, ba kynthup ruh ia bun phew ngut ki riew paidbah.
Na ka liang jong ki lehnoh Hamas, ki maham ia ki liengsuin bapher, ba kim bit ban her sha ka kad liengsuin Ben Gurion jong ka Tel Aviv, namar ba kin siat da ki nam ding jongki sha katei ka kad liengsuin, kaba dei ruh ka jaka leit jaka wan jong ki liengsuin na kylleng pyrthei ha katei ka jaka.
Phi don ban ong eiei?